29 май дар Вазорати мудофиаи Ҷумҳурии Тоҷикистон конференсияи ҷумҳуриявии илмӣ-ҳарбӣ таҳти унвони «Нақши зеҳни сунъӣ дар рушди Қувваҳои Мусаллаҳ» баргузор гардид.
Дар чорабинии мазкур коршиносону мутахассисони соҳа аз як қатор вазорату идораҳои давлатӣ, аз ҷумла Маркази тадқиқоти стратегӣ, Вазорати саноат ва технологияҳои нав, Кумитаи давлатии амнияти миллӣ, Академияи миллии илмҳои Тоҷикистон ва Агентии инноватсия ва технологияҳои рақамӣ иштирок намуданд. Ҳамзамон, афсарону кормандони раёсату шуъбаҳои дахлдори дастгоҳи марказӣ ва Ситоди генералии Қувваҳои Мусаллаҳ низ дар кори конференсия фаъолона ширкат варзиданд.
Конференсияро сардори Ситоди генералии Қувваҳои Мусаллаҳ – муовини якуми вазири мудофиа генерал-лейтенант Саидзода Бобоҷон ифтитоҳ намуда, таъкид дошт, ки истифодаи технологияҳои муосир, бахусус зеҳни сунъӣ, дар шароити ҷаҳонишавӣ ва рушди босуръати техникаву технологияҳо ба яке аз омилҳои муҳими таҳкими иқтидори мудофиавии давлат табдил ёфтааст. Зикр гардид, ки ҷорӣ намудани чунин технологияҳо метавонад самаранокии идоракунӣ, таҳлил ва банақшагирии низоми амниятиро ба маротиб баланд бардорад.
Сипас, аз ҷониби коршиносони соҳа вобаста ба ҷанбаҳои гуногуни истифодаи зеҳни сунъӣ дар фаъолияти Қувваҳои Мусаллаҳ маърузаҳои илмӣ пешниҳод гардиданд. Дар баромадҳо масъалаҳои татбиқи технологияҳои рақамӣ, таҳияи системаҳои интеллектуалӣ, таҳлили иттилоот ва истифодаи онҳо дар соҳаҳои гуногуни амниятиву мудофиавӣ мавриди баррасӣ қарор гирифтанд.
Дар ҷараёни конференсия зикр гардид, ки Қувваҳои Мусаллаҳи Ҷумҳурии Тоҷикистон ҳамчун сипари боэътимоди давлату ҳукумат бояд дар баробари рушди замони муосир аз имкониятҳои пешрафтаи илм ва технология, аз ҷумла зеҳни сунъӣ, васеъ истифода намуда, сатҳи омодабошии ҷангӣ ва касбияти ҳайати шахсиро боз ҳам баланд бардоранд.
Дар анҷом миёни иштирокчиён мубодилаи афкор сурат гирифт ва вобаста ба масъалаҳои баррасишуда пешниҳодҳои мушаххас манзур гардида, қарорҳои дахлдор қабул карда шуданд.
