Ба муносибати Рўзи Президенти Ҷумҳурии Тоҷикистон имрўз дар “Кохи афсарон”-и Вазорати мудофиаи кишвар бо иштироки ҳайатҳои роҳбариву фармондеҳии ин ниҳоди қудратӣ ва намояндагони сохторҳои қудратии мамлакат, Конференсияи ҷумҳуриявии илмӣ-назариявӣ таҳти унвони «Президенти Ҷумҳурии Тоҷикистон, мӯҳтарам Эмомалӣ Раҳмон- Асосгузори Артиши миллӣ» баргузор гардид.
Дар конференсияи мазкур иштирокчиёни он доир ба аҳамияти ин санаи бисёр муҳими таърихӣ, ки он боиси амалӣ гардидани орзую омоли неки мардум, кафили сулҳу оромӣ, меҳру муҳаббат, адолату шафқат, хираду пешрафт ва ваҳдату ҳамдилии ҷомеа гардидааст, изҳори андеша намуданд.
Аз ҷумла, муовини вазири мудофиаи мамлакат генерал-майор Шоҳиён Абдусаттор ва дигар иштирокчиёни он қайд намуданд, ки Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ, генерали артиш мӯҳтарам Эмомалӣ Раҳмон аз рўзҳои нахустини фаъолияти худ дар баробари анҷоми хизматҳои беназир барои рушду такомули Артиши миллӣ таваҷҷӯҳи хосса зоҳир намуда, дар давоми ин солҳо онро ба як нерӯйи пуриқтидор, таъминкунандаи амнияти давлату миллат табдил доданд.
Дар рафти конференсияи ҷумҳуриявии илмӣ-назариявӣ иштирокчиён инчунин оид ба марҳилаҳои тайнамудаи Қувваҳои Мусаллаҳи ҷумҳурӣ низ ёдовар шуда, нақши Президенти Ҷумҳурии Тоҷикистон, мӯҳтарам Эмомалӣ Раҳмонро дар бунёд ва таҳкиму тақвияти Артиши миллӣ баланд арзёбӣ намуданд.
Дар охири конференсияи ҷумҳуриявии илмӣ-назариявӣ бо изҳори сипосу миннатдорӣ ва эътимоду боварӣ таъкид карда шуд, ки мо хизматчиёни ҳарбии Қувваҳои Мусаллаҳ бо Пешвои миллати худ мӯҳтарам Эмомалӣ Раҳмон ифтихор менамоем ва ҳамеша ба савганди ёдкардаи хеш содиқ монда, вазифаи муқаддаси худро минбаъд низ бо ҳисси ифтихор ва масъулияти баланд аз Ватану ватандорӣ дар назди халқу миллат ва сарвари ғамхори худ адо менамоем.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
