Бояд гуфт, ки афсарону сарбозони Артиши миллии кишвар ҳамасола оини ниёгон-Наврӯзи хуҷастапайро дар фазои ҳамбастагӣ ва дӯстиву рафоқат, натанҳо бо ташкили чорабиниҳои фарҳангиву фароғатӣ ва мусобиқаҳои гуногуни варзишӣ ҷашн мегиранд, балки ба ин муносибат конфронсҳои илмӣ-амалӣ низ доир менамоянд.
Маҳз дар рӯзҳои ҷашнгирии Наврӯзи аҷам бо ташаббуси роҳбарияти Донишкадаи ҳарбии Вазорати мудофиа дар пойгоҳи ин муассиаи олии низомӣ, конфренсияи илмӣ-амалӣ таҳти мавзӯи “Нақши Наврӯз дар арсаи байналмилалӣ” баргузор гардид.
Дар рафти конфронс олимону муҳаққиқон ва намояндагони бахшу соҳаҳои гуногуни ҷомеа иштирок намуда, дар мавзуъҳои мухталиф маърузаҳо пешниҳод карданд. Иштирокчиён таъкид намуданд, ки мардуми тоҷик Наврӯзро дар давоми ҳазорсолаҳо ҳамчун яке аз ойинҳои беҳтарини миллӣ аз насл ба насл ба мерос гузошта, то замони мо расонидаанд.
Дар замони соҳибистиқлолӣ бо ташаббуси Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таҷлили ҷашни Наврӯз натанҳо дар Ҷумҳурии Тоҷикистон, балки дар сатҳи ҷаҳонӣ ба худ шукӯҳу шаҳомати тозаро касб намуд.
Вобаста ба ин, қайд карда шуд, ки ҷашни Наврӯз соли 2009-ум аз ҷониби Кумитаи ҳифзи мероси фарҳангии Созмони Милали Муттаҳид расман ба феҳристи ЮНЕСКО оид ба мероси башарияти фарҳанги ҷаҳонӣ дохил гардид. 19-уми феврали соли 2010 бошад, Маҷмаи умумии Созмони Милали Муттаҳид қатъномаеро қабул кард, ки тибқи он ҷашни Наврӯз мақоми байналмилалӣ касб намуд.
Боқӣ ШАРИФӢ
