Дар Конференсияи ҷумҳуриявии илмӣ-назариявӣ, ки таҳти мавзӯи “Конститутсия-кафили ҳифзи ҳуқуқ ва озодиҳои инсон ва шаҳрванд” дар “Кохи афсарон”и Вазорати мудофиа бо иштироки масъулини вазорат ва намояндагони сохторҳои қудративу мақомоти ҳифзи ҳуқуқи кишвар доир гардид, зимни он дар робита ба мавзӯи конференсияи навбатӣ аз ҷониби иштирокчиён маърӯзаҳои гуногун пешниҳод ва мавриди таҳлилу баррасӣ қарор гирифт.
Аз ҷумла қайд карда шуд, ки таҳияи қонуну санадҳои меъёрӣ- ҳуқуқӣ доир ба фаъолияти хизматчиёни ҳарбии Қувваҳои Мусаллаҳ низ дар асоси меъёрҳои Конститутсия ба роҳ монда шуда, пеш аз ҳама моддаи 43-юми ин санади олии ҳуқуқӣ, фаъолияти рӯзмарраи хизматчиёни ҳарбиро муайяну мушаххас намудааст. Вобаста ба ин, хизматчиёни ҳарбиро мебояд, барои фаъолияти пурсамар ҷиҳати таҳкими истиқлолияти давлатӣ, амният ва иқтидори мудофиавии он садоқатмандона хизмат намуда, баҳри дар доираи қонун ба роҳ мондани фаъолияти хамешагии хеш ҷаҳду талош намоянд.
Дар идомаи конференсия афзалияти дигари Конститутсияи Ҷумҳурии Тоҷикистон хусусияти миллӣ доштани он дониста шуд, ки ба андешаи ҳозирин дар ин ҳуҷҷати муҳим ормони мардуми тоҷик, суннатҳои таърихии давлатдорӣ ва ғояҳои инсондӯстонаи халқи кишвар инъикос ёфта, он заминаи ҳуқуқиро барои эҳёи суннату анъанаҳои фарҳангӣ ва бузургдошти муқаддасоти миллӣ фароҳам овард.
Боқӣ ШАРИФӢ,
подполковник
