Конференсияи ҷумҳуриявии илмӣ-назариявӣ дар мавзӯи “Конститутсия ва нақши он дар рушди илму маориф”, ки ба муносибати 30-юмин солгарди қабули Конститутсияи Ҷумҳурии Тоҷикистон дар Донишкадаи ҳарбии Вазорати мудофиа баргузор гардид, садо додани Суруди миллӣ таҳти навои Оркестри ҳарбӣ-нафасии ин муассисаи таълимии ҳарбӣ ба кори он оғози расмӣ бахшид.
Зимни баргузории конференсияи мазкур намояндагон аз Суди конститутсионии Ҷумҳурии Тоҷикистон, Академияи миллии илмҳои Тоҷикистон, Академияи Вазораи корҳои дохилӣ, Академияи идоракунии давлатии назди Президенти Ҷумҳурии Тоҷикистон ва дигар муассисаҳои олии касбии кишвар иштирок намуда, вобаста ба аҳамияти Конститутсия дар ҷомеаи шаҳрвандӣ, Конститутсия ҳамчун саннади олӣ ва ҳуҷҷати муҳими таърихӣ, сиёсӣ ва ҳуқуқӣ маърӯзаҳои илмӣ намуданд. 
Масъулини Донишкадаи ҳарбӣ қабл аз оғози суханронӣ нахуст иштирокчиёнро ба ҳозирин муаррифӣ намуда, зимни пешниҳоди маърӯзаи хеш қайд карданд, ки Конститутсия ба сифати қонуни олӣ заминаҳои ҳуқуқии пешрафти ҷомеаро аз тариқи қабули қонунҳои нав гузошта, муносибатҳои ҷамъиятии мухталифро ба танзим даровард ва асосҳои ҳуқуқии рушду такомули давлатдории мустақили миллиро фароҳам гардонид.
Ҳамин тавр, иштирокчиён ҳар яке дар навбати худ ба сухан баромада, дар мавзӯъҳои “Конститутсияи Ҷумҳурии Тоҷикистон ва 30 соли рушди меъёрҳои он”, “Конститутсия сарчашмаи сиёсати давлатӣ дар соҳаи таҳсилот”, “Тағйиру иловаҳои ба Конститутсия воридгардида заминаи такмили системаи сиёсӣ ва рушди давлатдорӣ”, “Конститутсия сарчашмаи созандагиву саодатмандии сокинон”, “Нақши Конститутсияи Ҷумҳурии Тоҷикистон дар рушди қонунгузории соҳаи маориф” ва “Маърифати ҳуқуқӣ ва роҳу воситаҳои ташаккули он дар Ҷумҳурии Тоҷикистон” маърӯзаҳо намудаанд.
Зимнан, аз ҷониби иштирокчиёни конференсия қайд карда шуд, ки Конститутсияи Ҷумҳурии Тоҷикистон дар ҳаёти мардуми тоҷик санади сарнавиштсоз ба ҳисоб рафта, ифодакунандаи ормонҳои миллӣ мебошад, ки дар он арзишҳои волои инсонӣ таҷассум ёфтааст.
Зимни ҷамъбасти конференсияи ҷумҳуриявӣ аз ҷониби роҳбарияти ин муассисаи таълимии ҳарбӣ ба иштирокчиёни он дар вазъияти тантанавӣ сипосномаҳо тақдим карда шуд.
Шоҳин ШАРИФОВ
