Аз оғози даъвати баҳории шаҳрвандон ба хизмати ҳатмии ҳарбӣ чил рӯз сипарӣ гардида, аллакай, то ин дам як қатор шаҳру ноҳияҳои мамлакат аз иҷрои пурраи нақшаи пешбинигардида гузориш доданд.
Аз ҷумла, тавре қаблан хабар дода будем, аз якуми апрели соли 2023-юм бо оғоз гардидани даъвати баҳории шаҳрвандон ба хизмати ҳарбӣ, дар нахустин рӯзи даъват, аввалин шуда дар ҷумҳурӣ, шаҳру навоҳии вилояти мухтори кӯҳистони Бадахшон ва то охири моҳи апрели соли равон бошад, чаҳор навоҳии шаҳри Душанбе нақшаи пешбинишударо сад фоиз иҷро намуданд.
Дар давоми чил рӯзи ҷараёни ин маъракаи муҳими сиёсӣ шаҳру ноҳияҳои Лахш Нуробод, Рашт, Сангвору Тоҷикобод ва шаҳри Ваҳдат низ аз анҷоми даъвати баҳории шаҳрвандон ба хизмати ҳатмии ҳарбӣ гузориш дода, иҷрои нақша дар шаҳру ноҳияҳои тобеи ҷумҳурӣ бошад, то имрӯз ба 77 фоиз баробар мебошад.
Натиҷаи фаъолияти хуби масъулини мақомоти вобастаи даъватӣ дар вилояти Хатлон аст, ки ноҳияҳои Вахш, Данғара, Фархор ва шаҳри Леваканд даъвату гусели ҷавонписарони синни даъватиро ба анҷом расонида, иҷрои нақша дар ин вилоят 73 фоизро ташкил медиҳад.
Чорабинии бошукӯҳи идона дар самти гусели муҳофизони ояндаи Ватан дар давоми чил рӯзи ҷараёни ин маъракаи муҳими сиёсӣ дар вилояти Суғд 68 фоиз ва умуман, то ин дам дар тамоми қаламрави ҷумҳурӣ бошад, он ба 76 фоиз баробар мебошад.
Маркази матбуоти
Вазорати мудофиаи
Ҷумҳурии Тоҷикистон
