Санаи 14 октябр машқҳои минтақавии “Бирлик-2025” дар машқгоҳи таълимии “Каттақурган”- и шаҳри Самарқанди Ҷумҳурии Узбекистон расман оғоз гардид.
Дар маросими ифтитоҳи ин машқҳо муовини вазири мудофиаи Ҷумҳурии Ӯзбекистон полковник Норбаев Алишер Тухтаевич, фармондеҳони Ҳавзаи марказии ҳарбии Қувваҳои Мусаллаҳи Ҷумҳурии Узбекистон, ҳайатҳои ҳарбии ҷумҳуриҳои Озарбойҷон, Тоҷикистон, Қазоқистон, Қирғизистон ва намояндагони як қатор мақомоти ҳокимияти давлатии шаҳру ноҳияҳои вилояти Самарқанд ва дигар шахсони расмии кишвари қабулкунанда ширкат доштанд.
Муовини вазири мудофиаи Ҷумҳурии Узбекистон дар баромади худ вобаста ба таҳкими дӯстии мутақобила байни давлатҳои иштироккунандаи машқҳои минтақавӣ иброз намуд, ки баргузории машқҳои минтақавии “Бирлик-2025” дар шароити шиддат гирифтани вазъи геосиёсии ҷаҳон ва таҳдиду хатарҳои замони муосир муњиму саривақтӣ аст.
Дар қисмати ниҳоии чорабинии мазкур баҳри болидахотирии ҳайати ҳайатҳои ҳарбии давлатҳои иштироккунада аз ҷониби оркестри ҳарбии Ҳавзаи марказии ҳарбӣ ва ҳайати эҷодии вилояти Самарканд барномаи консертии дилнишин пешкаш гардид.
Сипас, аз ҷониби роҳбари машқҳои минтақавӣ ба ситоди таълимгирандагон, ки дар ҳайати он гурӯҳи амалиётии ҳайати ҳарбии Тоҷикистон шомил мебошад, вобаста ба машқҳо фармоиши ҷангӣ дода шуд.
Инчунин дар доираи машқҳо таҳти унвони “Тирандози тактикӣ” мусобиқаи тирпарронӣ доир шуд.
Ёдовар мешавем, ки дар машқҳои мазкур аз Ҷумҳурии Тоҷикистон гурӯҳи амалиётии Ситоди генералии Қувваҳои Мусаллаҳ ва як воҳиди низомии Қӯшунҳои хушкигарди Вазорати мудофиа иштирок менамоянд.
Маркази матбуоти ва иттилооти
Вазорати мудофиаи Ҷумҳурии Тоҷикистон
