Хотираи нек ва кору пайкори ҷавонмардоне, ки барои халқу Ватан хизмат намудаву то охирин нафас дар саргаҳи номуси ватандорӣ истодаанд, ҷовидона мебошад. Маҳз, бо ана ҳамин мақсад, яъне ҳамчун рамзи эҳтиром ва ба хотири арҷгузорӣ ба хизматҳои фарзандони сарсупурдаи ин марзу бум дар моҳвораи таҷлили бошукӯҳи ҷашни Истиқлоли давлатӣ, дар пойгоҳи яке аз қисмҳои ҳарбии Қӯшунҳои зудамали Қувваҳои Мусаллаҳи Ҷумҳурии Тоҷикистон дар ҳудуди минтақаи Рашт Муҷассамаи ҷанговарони десанти кӯҳӣ бо аксу тасвирҳои рамзӣ, қаҳрамониву фидокорӣ ва гулгашт барои истироҳату фароғати сарбозон сохта ба истифода дода шуд. Гулгашти навбунёд аз девори аксу тасвирҳои таърихӣ, гӯшаҳои фахрии муқаддасоти милливу қаҳрамонони Тоҷикистон, нақшу нигор, рамзу нишонаҳои десантӣ ва нишастгоҳу суҳбаткадаҳо иборат буда, дар атрофи он ҳавзҳои фавворадор низ бунёд гардидааст.
Бо дидани манзараҳои ҷолиб ва лаҳзаҳои таърихии хизмати фарзандони сарбози Ватан, метавон гуфт, ки ин гулгашти зебо ба як мавзеи хуби фароғатӣ табдил ёфтааст, ки сарбозон имкон доранд, чорабиниҳои фарҳангӣ ва лаҳзаҳои фароғатии хизмати худро дар ин мавзеъ сипарӣ намоянд.
Зимни суҳбат бо мо афсарону сарбозони қисми ҳарбӣ, ин мавзеи диданибобро натанҳо ҷойи истироҳату фароғат, балки мактаби омӯзиши садоқат дар роҳи муқаддас шумурдани халқу Ватан ва ба ҷо овардани хизмати ҷавонмардона дар ин арса номиданд.
Ба ғайр аз рамзу нишонаҳои аксёфта дар девораҳои чун кӯҳ устувор, инчунин дар зери шиори “то марг мубориза мебарем”-и ҷузъу томи десанти кӯҳӣ, фаъолияти пурмасъули десантчиён ва машғулиятҳои ҳамарӯзаи тактикӣ-сафии онҳо дар шароити кӯҳсор нишон дода шудааст, ки ҳар нафарро ба андешаи садоқати ҷовидона дар роҳи муҳаббат ба ин марзу бум мебарад.
Баъд аз ба истифода додани ин гулгашти зебо, ҳайати фармондеҳии Қӯшунҳои зудамал, масъулини мақомоти иҷроияи ҳокимияти давлатии ноҳияи Рашт ва дигар меҳмонон дар чорабинии тантанавии десантчиёни кӯҳӣ, ки бо даровардани Байрақи ҷангии қисми ҳарбӣ ва бо садо додани Суруди миллӣ аз ҷониби ҳозирин оғоз гардид, иштироку суханронӣ намуданд.
Зимни баромади худ ҳайати меҳмонон, сараввал афсарону сарбозонро ба ифтихори солгарди ҷашни соҳибистиқлолии кишвари азизамон табрику муборакбод намуда, зимнан қайд карданд, ки Ҳукумати мамлакат таҳти сиёсати хирадмандонаи Пешвои миллат мӯҳтарам Эмомалӣ Раҳмон барои ба талаботи рӯз мутобиқ гардонидан ва дар сатҳи баланд роҳандозӣ намудани хизмат дар сафи Артиши миллӣ тадбирҳои заруриро амалӣ намуда, бо ин мақсад аз тамоми захираву имкониятҳо истифода мекунанд. Доимо баҳри беҳтар гардонидани шароити хизматӣ ва зисту зиндагонии ҳайати шахсии қисми ҳарбӣ, пурзӯр намудани иқтидори ҷангӣ ва сатҳи муҷаҳҳазгардонӣ бо техникаву аслиҳаи замонавӣ чораҳои зарурӣ андешида мешавад.
Ҳамин тавр, баромадкунандагон бо ифтихор изҳор доштанд, ки то имрӯз десантчиёни Тоҷикистон рисолати касбӣ ва вазифаи фарзандии худро дар назди давлату миллат сарбаландона иҷро намуда, дар ҳифзи дастовардҳои Истиқлолияти давлатӣ, ҳимояи манфиатҳои давлат ва амнияти шаҳрвандон корнамоиҳои назаррас нишон додаанд.
Дар майдони баргузории ҷамъомад аз ҷониби гурӯҳи десантчиёни як воҳиди десантии бригада, ҷанги тан ба тан бо усулҳои шарқӣ ва машқҳо бо силоҳ нишон дода шуд, ки он аз чусту чолокӣ, рӯҳияи шикастнопазир, матонату далерӣ ва садоқату омодагии сатҳи баланди десантчиёни ҷавон дарак медод.
Ҳамзамон, хизмати сарбаландонаи афсарону сарбозони ин қисми ҳарбӣ бо ифтихорномаву сипосномаҳо ва медалҳои ҷашнӣ қадрдонӣ карда шуд.
Қисмати расмии ҷамъомад бо гузашти низомии афсарону сарбозон дар назди минбар ва ҳайати меҳмонон ба поён расид.
Боқӣ ШАРИФӢ,
подполковник
