Чанде пеш дар ҷамоати деҳоти Ворухи шаҳри Исфараи вилояти Суғд бинои маъмурии комиссариати ҳарбӣ мавриди баҳрабардорӣ қарор гирифт.
Дар маросими ифтитоҳи бинои мазкур роҳбарияти Вазорати мудофиа, масъулини Мақомоти иҷроияи ҳокимияти давлатии шаҳри Исфара ва дигар шахсони расмӣ ширкат намуда, аз дохил ва ҳудуди бинои комиссариати ҳарбӣ дидан ба амал оварданд. Ҳамзамон, аз сатҳу сифати корҳои сохтмонӣ дар ин иншооти ҳарбӣ изҳори қаноатмандӣ намуда, ин ҳама созандагиву бунёдкориҳоро самараи Истиқлоли давлатӣ ва сиёсати бунёдкоронаи сарвари давлат, муҳтарам Эмомалӣ Раҳмон арзёбӣ намуданд.
Қобили зикр аст, ки Комиссариати ҳарбии ҷамоати деҳоти Ворухи шаҳри Исфара, дар масоҳати 180 метри мураббаъ, аз сифр бо тарҳу усулҳои наву замонавӣ ва мувофиқ ба меъёру талаботи муосири низомӣ бунёд гардида, он аз ду ошёна ва таҳхона иборат мебошад. Дохили бино аз 10 утоқи кории афсарону ҳайати шахсӣ, нуқтаи навбатдори фаврӣ, мавзеи қабули даъватшавандагон, ҳуҷраҳои махсус баҳри гузаронидани муоина ва ташхиси тиббии шаҳрвандон ва аз дигар ҳуҷраҳои майишӣ иборат мебошад, ки он бо тамоми шароити зарурӣ, мебел, системаи алоқаи муосир, видеокамераҳои мушоҳидавӣ ва бо дигар таҷҳизоти лозима муҷаҳҳаз гардонида шудааст.
Таҳхонаи бинои комиссариати ҳарбӣ бо таҷҳизоти муосири кориву хизмати ҷиҳозонида шуда, он барои баргузории ҷамъомади Ситоди минтақаи мудофиаи ҳудудиву сафарбарӣ, дарсу машғулиятҳои гуногуни таълимии ҳарбӣ ва баҳри доир намудани дигар чорабиниҳои нақшавии масъулини мақомоти вобастаи соҳа пешбинӣ гардидааст.
Атрофи иншооти мазкур бо девор ва панҷараҳои оҳанин мустаҳкам гардонида шудааст ва барои нишаст ва қабули шаҳрвандон низ суҳбаткада муҳайё мебошад. Ҳамзамон, ҳудуди иншооти мазкур, дар масоҳати 560 метри мураббаъ бо гулу буттаҳо ва растаниҳои гуногуни ороишӣ зинат ёфта, роҳраву дигар атрофи бинои комиссариати ҳарбӣ бетонпўш карда шудааст.
Комиссариати ҳарбии ҷамоати деҳоти Ворухи шаҳри Исфара бо харҷи беш аз 2 миллион сомонӣ ва аз ҳисоби маблағҳои мутамаркази буҷетӣ барои иншооти Вазорати мудофиа пешбинишуда, соли 2022 ба нақша гирифта шуда, он дар давоми 7 моҳ аз сифр сохта ва мавриди баҳрабардорӣ қарор гирифтааст.
Қобили қайд аст, ки тайи чанд соли охир, беҳтар гардидани вазъи иқтисодии мамлакат ва сиёсати дурандешонаи роҳбарияти давлату ҳукумат бунёду азнавсозии биноҳои маъмурии комиссариатҳои ҳарбӣ дар мамлакат бо маром идома дошта, он ҷиҳати ободу зобо гардонидани гушаҳои гуногуни Тоҷикистони азиз ва бо фароҳам овардани шароити кору хидмат барои низомиён, дар қаламрави кишвар мусоидат намудааст.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
