Дар партави сиёсати созандагию бунёдкории Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Леваканти вилояти Хатлон, бинои Муассисаи давлатии “Мадагори мудофиа”-и Вазорати мудофиаи мамлакат мавриди баҳрабардорӣ қарор гирифт. Қабл аз оғози маросими ифтитоҳи бинои навбунёд масъулини Вазорати мудофиа, Кумитаи марказии мадагори мудофиа ва Мақомоти иҷроияи ҳокимияти давлатии шаҳри Левакант аз намоиши навъҳои гуногуни лавозимоти ҳарбӣ-варзишӣ, техникаҳои истифодашавандаи соҳа ва дастгоҳу таҷҳизоти варзишии муассисаи мадагори мудофиа дар ин ноҳия дидан намуда, бо таъйинот ва хусусияттҳои истифодабарии онҳо шинос гардиданд.
Сипас, дар ҷараёни ба истифода додани бинои мазкур ва зимни муаррифии имконияту шароитҳои хизматии он, роҳбарияти Муасисаи давлатии мадагори мудофиа зикр карданд, ки тайи солҳои охир барномаи маҷмӯи таъмиру сохтмонӣ рӯйи даст гирифта шудааст, ки дар заминаи он биноҳои маъмурӣ, пойгоҳҳои моддӣ-техникӣ ва таълимию варзишии сохторҳои таркибии муассиса ба шароити имрӯза ва талаботи давру замон мутобиқ гардонида мешаванд. Ин аст, ки имрӯз бинои маъмурии Муассисаи давлатии “Мадагори мудофиа”-и Вазорати мудофиа дар шаҳри Левакант бо шарту шароити мусоид ва имкониятҳои васеи кору фаъолият сохта, мавриди истифода қарор дода шуд.
Бояд ёдовар шуд, ки тибқи лоиҳа бинои мазкур аз ҳуҷраҳои корӣ, синфхонаҳои машғулиятҳои қоидаҳои ҳаракат дар роҳ, сохтори автомобил, ҳуҷраҳои ёрирасон, нуқтаи нигоҳдории техникаҳои автомобилӣ ва дигар шароити лозимӣ иборат аст. Илова бар ин, дар назди бино машқгоҳи мошинронӣ низ қарор дорад, ки барои босифат омода намудани мутахассисон мусоидат менамояд.
Умуман, мавриди истифода қарор гирифтани бинои маъмурии Муассисаи давлатии “Мададгори мудофиа”-и Вазорати мудофиа дар шаҳри Леваканти вилояти Хатлон имкон фароҳам меорад, то ки кормандон ва касбомӯзон дар шароити беҳтари хизматӣ ва таълимӣ фаъолият намоянд ва соҳибкасб шаванд.
Боқӣ ШАРИФӢ,
подполковник
