Дар доираи нақша-чорабиниҳои ҷашнӣ ва бо мақсади сазовор таҷлил намудани ҷашни 33 солагии Истиқлоли давлатии Ҷумҳурии Тоҷикистон дар баробари ташкилу баргузории дигар чорабиниҳои ҷашнӣ дар пойгоҳи ҷузъу томи Вазорати мудофиаи мамлакат, инчунин дар Донишкадаи ҳарбии ин ниҳоди қудратии кишвар низ Конференсияи ҷумҳуриявии илмӣ-амалӣ таҳти унвони “Эмомалӣ Раҳмон-Асосгузори давлати навини тоҷикон” баргузор гардид.
Кори конференсияро масъулини Вазорати мудофиа бо сухани ифтитоҳии худ оғоз намуда, зимнан қайд карданд, ки Ҷумҳурии Тоҷикистон баробари ба даст овардани Истиқлолияти давлатӣ сохтори идории худро соҳибихтиёру ҳуқуқбунёд ва демократию дунявӣ эълон намуда, роҳҳои расидан ба ҳадафҳои стратегиро пеш гирифт ва татбиқу амалӣ намудани ин хадафҳои бузург давра ба давра амалӣ карда мешаванд. Албатта, дар ин ҷода саҳми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва мардуми шарафманду соҳибтамаддуни тоҷик басо ҳам бузург аст.
Ҳамин тавр, иштирокчиёни конфронс, ки аз намояндагони бахшу соҳаҳои гуногуни давлатӣ ва сохторҳои қудратӣ буданд, дар мавзӯъҳои “Истиқлол ва арзишҳои он”, “Истиқлоли давлатӣ-кафили суботу амният”, “Нақши Президенти Ҷумҳурии Тоҷикистон муҳтарам Эмомалӣ Раҳмон дар ташаккули худшиносии миллати тоҷик”, “Истиқлолият-неъмати бебаҳои таърихӣ ва бунёдгузори рушди ҷомеа” маърӯзаҳо намуда, таъкид карданд, ки мардуми Тоҷикистон таҳти роҳбарии Пешвои миллат мӯҳтарам Эмомалӣ Раҳмон бо эҳё кардани суннату анъанаҳои миллӣ ва ноил гардидан ба дастовардҳои бузурги даврони соҳибистиқлолии кишвар дубора ба гузаштаи аслии хеш ва музаффариятҳои таърихии аҷдодонамон рӯ оварда, ҳадафҳо ва стратегияи рушду инкишофи минбаъдаи бахшҳои сиёсиву иқтисодӣ ва иҷтимоиву фарҳангии худро бо назардошти манфиатҳои миллӣ ва таъмини зиндагии шоистаи мардум таҳия ва амалӣ карданд.
Ҳамзамон, баромадкунандагон зикр намуданд, ки баҳри таҳкиму пойдорӣ ва пояндагии ин неъмати пурарзиши таърихӣ саҳми хизматчиёни ҳарбии Артиши миллӣ низ бениҳоят бузург ва шоистаи таҳсин аст. Маҳз бо ҷасорату мардонагӣ ва хизматҳои шоистаи хизматчиёни ҳарбӣ дар кишвар сохти канститутсионӣ барқарор ва роҳи минбаъдаи бунёди давлатдории миллӣ ҳамвору устувор гардид.
Дар фарҷоми конфронс аз ҷониби Роҳбарияти донишкадаи ҳарбии Вазорати мудофиа ба иштирокчиёни конференсия сипосномаву ифтихорномаҳо тақдим карда шуд.
Боқӣ ШАРИФӢ,
подполковник
