Дар толори Муассисаи давлатии «Мададгори мудофиа»-и Вазорати мудофиаи Ҷумҳурии Тоҷикистон, ки ниҳоди тарбиятгари наврасону ҷавонон дар рӯҳияи ҳарбӣ-ватандӯстӣ ба шумор меравад, ба истиқболи 35-умин солгарди Истиқлолияти давлатии Ҷумҳурии Тоҷикистон ҷамъомади тантанавӣ баргузор гардид.
Роҳбарияти Муассисаи давлатии «Мададгори мудофиа»-и Вазорати мудофиаи Ҷумҳурии Тоҷикистон зимни суханронии табрикии худ Истиқлолияти давлатии Тоҷикистонро беҳтарин ва пурарзиштарин неъмат дар таърихи муосири миллати куҳантамаддуни тоҷик номида, аҳли толорро бо солгарди 35-уми ин дастоварди олӣ табрику таҳният намуд.
Дар рафти чорабинӣ таъкид шуд, ки бақои миллат, пойдории истиқлолияти давлатӣ, инчунин ноил гардидан ба муҳимтарин дастоварди он – сулҳу субот ва ваҳдати миллӣ маҳсули хиради бузург, талоши ватандӯстона ва ташаббусу иқдоми барҷастаи Пешвои муаззами миллат, муҳтарам Эмомалӣ Раҳмон ба шумор меравад.
Истиқлолият муқаддастарину азизтарин неъмат, рамзи саодат ва асолати миллат, шарафу номуси ватандорӣ ва нишонаи пойдориву бақои давлат мебошад. Зеро истиқлолияти давлатӣ ҳувияти миллии мардуми тоҷикро ба зинаи комилан нав бардошт ва барои тақвияту густариш пайдо кардани ваҳдати тамоми сокинони Тоҷикистон заминаи пойдор фароҳам овард.
Посдории арзишҳои маънавӣ ва асолати миллӣ низ бо шарофати истиқлол имконпазир буда, ҳифзи ҳувияти миллӣ ва таъмини бақои бардавоми давлат низ аз баракати соҳибихтиёрӣ ва мустақилият ба даст меоянд.
Афсарон ва кормандони Муассисаи давлатии «Мададгори мудофиа» дар роҳи амалӣ намудани мақсадҳои оинномавӣ – тарбияи ҳарбӣ-ватандӯстии шаҳрвандон, тайёр намудани мутахассисон барои эҳтиёҷоти Қувваҳои Мусаллаҳи Ҷумҳурии Тоҷикистон ва рушду инкишофи намудҳои ҳарбӣ-техникии варзиш фаъолият намуда, бо ин роҳ дар мустаҳкам намудани пояҳои истиқлолияти давлатӣ ва пешрафти ватанамон саҳми арзанда мегузоранд.
Зимни чорабинии ҷашнӣ тазаккур дода шуд, ки фазои пурнишоти Ваҳдати миллӣ пояҳои истиқлолияти давлатии моро мустаҳкамтар сохта, неруи маънавӣ ва қобилияти зеҳнии аҳли ҷомеаро ба сӯи созандагӣ ва бунёдкорӣ ба нафъи такон бахшидани суръати рушду инкишофи миллӣ дар марҳилаи сифатан нав сафарбар намуд.
Дар интиҳои чорабинии ҷашнӣ заҳмату талошҳои хизматчиёни ҳарбӣ ва кормандони фаъоли муассиса аз ҷониби роҳбарияти он ба таври шоиста бо ифтихорномаҳо мавриди қадрдонӣ қарор гирифтанд.
president.tj
