Ҷамъомади тантанавӣ ба муносибати таҷлил аз 27-умин солгарди Рӯзи Ваҳдати миллӣ дар Вазорати мудофиаи мамлакат бо даровардани Парчами давлатӣ, Байрақи ҷангӣ ба толор ва бо садо додани Суруди миллӣ оғоз гардид.
Зимни баргузории ҷамъомад роҳбарияти Вазорати мудофиа ва раиси Кумитаи иҷроияи Ҳаракати Ваҳдати миллӣ ва эҳёи Тоҷикистон дар назди ҳайати роҳбариву фармондеҳӣ ва хизматчиёни ҳарбии Дастгоҳи марказии вазорат ва Ситоди генералии Қувваҳои Мусаллаҳ вобаста ба нақш ва моҳияти Созишномаи умумии истиқрори сулҳ ва ризоияти миллӣ суханронӣ намуда, ҷанбаъ ва омилҳои гуногуни таҳкими Ваҳдати миллиро мавриди муҳокима қарор доданд.
Зимнан, таъкид карда шуд, ки Ваҳдати миллӣ ҷашни миллии тоҷикон аст, ки ҳаргиз роҳи тӯлонии ба даст овардани он аз ёдҳову аз варақҳои таърих зудуда намешавад ва тоҷикон ҳамчун миллати дорои худшиносиву худогоҳии баланд барои ҳифзи ин санаи муборак ва дастовардҳои он ҳамеша бо азму иродаи қавӣ ва дилу нияти пок талош хоҳанд намуд.
Албатта, дар ин ҷода саҳми Пешвои миллат муҳтарам Эмомалӣ Раҳмон бузург аст, ки зина ба зина дар кишвар суботу оромӣ пойдор гардида, раванди бозсозии иқтисоди кишвар, рушди демократия, гуногунандешӣ, ташаккули афкори созандаву худшиносии миллӣ равнақу ривоҷи тоза касб намуда, пояҳои Ваҳдати миллӣ мустаҳкам гардид.
Ҳамзамон, дар идомаи ин ҷамъомад, Артиши миллӣ низ яке аз омилҳои таҳкимбахш ва поягузори Ваҳдати миллӣ дар кишвар арзёбӣ гардида, баҳри барқарор кардани сохти конститутсионӣ ва фароҳам сохтани фазои орому осуда садҳо ҷавонмардони бонанги Ватан дар сангарҳо ҷон бохтанд ва барои мо сулҳу ваҳдати сартосариро фароҳам сохтанд.
Дар воқеъ, аҳамияти муҳиму сарнавиштсози ин санаи таърихӣ мебошад, ки ҳамасола Рӯзи Ваҳдат ҳамчун ҷашни умумимиллӣ дар саросари кишвар, аз ҷумла дар Қувваҳои Мусаллаҳ бо шукӯҳу шаҳомати хоса таҷлил карда мешавад. Низомиёни мамлакат низ дар рӯзҳои таҷлил аз ин ҷашнвораи таърихӣ дар пойгоҳи тамоми қисму воҳидҳои низомӣ ҷамъомадҳои тантанавӣ, конференсияҳои илмӣ-амалӣ, мусобиқаҳои гуногуни варзишӣ ва чорабиниҳои фарҳангиву фароғатиро бо оростани дастархони идона доир менамоянд.
Боқӣ ШАРИФОВ
