Имрӯз ба муносибати 32-юмин солгарди Истиқлолияти давлатии Ҷумҳурии Тоҷикистон дар толори асосии Вазорати мудофиаи Ҷумҳурии Тоҷикистон ҷамъомади тантанавӣ баргузор гардид.
Ҷамъомади бошукӯҳи ҷашнӣ тибқи қавоиди доимии низомиён бо ворид намудани Парчами давлатӣ, Байрақи ҷангӣ ва баъд аз садо додани Суруди миллӣ оғоз гардид.
Дар чорабинии мазкур Котиби Шӯрои амнияти ҷумҳурӣ ва роҳбарияти Вазорати мудофиа дар назди ҳозирин баромад карда, изҳор доштанд, ки Қувваҳои Мусаллаҳи кишвар яке аз дастовардҳои муҳими Истиқлоли давлатӣ ба ҳисоб рафта, он бо дастгирии бевоситаи Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон дар давоми соҳибистиқлолии мамлакат рушду нумӯъ ёфтааст.
Дар ҷамъомад инчунин вобаста ба марҳилаҳои тайнамудаи артиш қайд карда шуд, ки афсарону сарбозони Қувваҳои Мусаллаҳ дар давоми солҳои Истиқлоли миллӣ, озмоишҳои сахту сангинро пушти сар карда, рисолати касбии худро иҷро карда тавонистанд ва таҳти роҳнамоии Пешвои миллат ба як нерӯйи пурзӯру тавоно табдил ёфта, ба комёбиву муваффақиятҳои назаррас ноил гардиданд.
Бо итминони комил иброз гардид, ки имрӯз Қувваҳои Мусаллаҳи мамлакат бо омодабошии доимии ҷангӣ, қодир аст, ки вазифаҳои муқаддасу пуршарафи хешро вобаста ба ҳифз ва ҳимояи соҳибихтиёрӣ, таъмини сулҳу субот, муҳофизати манфиатҳои давлат ва амнияти шаҳрвандон адо намояд ва дар роҳи баланд бардоштани иқтидори мудофиавии кишвар қадамҳои устувор гузорад.
Дар ҷараёни баргузории чорабинии ҷашнӣ ва доираи ҳавасмангардонии низомиён аз номи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон ба як қатор хизматчиёни ҳарбии Вазорати мудофиа мукофотҳои давлатӣ тақдим карда шуд.
Инчунин дар идомаи ҷамъомад бо фармоиши роҳбарияти Вазорати мудофиаи кишвар низ чанде аз низомиёни ин мақомоти баландпояи қудратӣ, бо медалу Ифтихорномаҳо, рутбаҳои навбатии ҳарбӣ ва тӯҳфаҳои хотиравӣ сарфароз гардонида шуданд.
Қобили зикр аст, ки чорабиниҳои ҷашнӣ ба муносибати 32-юмин солгарди Истиқлолияти давлатии Ҷумҳурии Тоҷикистон дар қисмҳои низомии Вазорати мудофиа, муассисаҳои таълимии ҳарбӣ ва маҷмӯан дар тамоми ҷузъу томи Қувваҳои Мусаллаҳи мамлакат бо шукӯҳи хоса идома доранд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
