Ҷамъомади методӣ-таълмии афсарони соҳаи корҳои сиёсӣ-тарбиявии ҷузъу томи Вазорати мудофиа ва навъҳои қӯшуни Қувваҳои Мусаллаҳи мамлакатро масъулини роҳбарикунандаи ин самти хизмат дар Артиши миллӣ оғози расмӣ бахшида, оид ба ҳадафу моҳияти он, маърифату ҷаҳонбинии ҳарбӣ-сиёсии хизматчиёни ҳарбӣ, доир ба вазъи қонунияту тартиботи ҳуқуқӣ, интизомӣ ҳарбӣ ва дигар масъалаҳои марбут ба фаъолияти соҳавии онҳо ибрози назар карданд.
Зимнан ҳамаи иштирокчиёни ҷамъомад ё худ афсарони самти корҳои сиёсӣ-тарбиявиро ҷиҳати боз ҳам қавӣ ва мустаҳкам намудани инзоми ҳарбӣ ва донишу малакаи касбии ҳайати шахсӣ бо супоришҳои мушаххас вазифадор намуданд.
Дар қисмати дигари ҷамъомад вохӯриву мулоқоти афсарони соҳа бо намояндагони Маркази тадқиқоти стратегии назди Президенти Ҷумҳурии Тоҷикистон, Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Сарпрокуратураи ҳарбии ҷумҳурӣ ва Агентии назорати давлатии молиявӣ ва мубориза бо коррупсияи назди Ҳукумати Ҷумҳурии Тоҷикистон баргузор гардид. Ҳамин тавр, вобаста ба иҷрои дастуру супоришҳои Сарфармондеҳи Олии Қувваҳои Мусаллаҳ, генерали артиш муҳтарам Эмомалӣ Раҳмон дар идомаи ҷамъомад иштирокчиён бо пешниҳоди маърӯзаҳо дар мавзӯи баланд бардоштани ҳисси ватандӯстиву ватанпарварӣ, ғуруру ифтихори миллӣ, тартиботу волоияти қонун дар байни хизматчиёни ҳарбӣ ва татбиқи бомароми сиёсати давлатии ҷавонон баромад намуда, ҳамзамон бо дарназардошти вазъи ҳарбӣ-сиёсии минтақа ва ҷаҳон масоили марбут ба ин самтро низ муҳокима намудаанд.
Воқеан, афсарон оид ба корҳои сиёсӣ-тарбиявӣ дар сафи Қувваҳои Мусаллаҳ вазифаҳои пурмасъулро ба зимма доранд. Зеро, корҳои тарбиявӣ воситаи таъсиррасонии равонӣ ба шуур ва рафтори шахс мебошад. Дар раванди тазодҳои сиёсӣ ва буҳронҳои маънавӣ масъалаи мустаҳкам кардани пояҳои ахлоқӣ, интизоми ҳарбӣ, ташаккули маърифати ҳуқуқию сиёсӣ ва дар ин замина баланд бардоштани эҳсоси худшиносиву худогоҳии ҳайати шахсӣ яке аз вазифаҳои аввалиндараҷаи афсарони ин самти фаъолият гардидааст.
Ин аст, ки дар доираи нақшаи баргузории ҷамъомади мазкур афсарон аз Китобхонаи миллии Тоҷикистон ва шароиту имкониятҳои фароҳамгардида дар он, шинос гардиданд. Албата, ин бесабаб нест, зеро афсарон оид ба корҳои сиёсӣ-тарбиявӣ дар қисму воҳидҳои низомӣ масъулияти таълиму тарбия, худогоҳиву хештаншиносӣ ва интизоми хизматии ҳайати шахсиро бар ӯҳда доранд. Дар ин қисмати чорабинӣ ҳамчун ҳусни таваҷҷӯҳ роҳбарият ва чанде аз кормандони Китобхонаи миллии Тоҷикистон барои ҳамкориҳои доимиву судуманд бо сипосномаҳои Вазорати мудофиаи кишвар қадрдонӣ карда шуданд.
Боқӣ Шарифов
