Ба ифтихори Рӯзи Забони давлатӣ ва дар доираи нақша-чорабиниҳои ҷашнии низомиёни мамлакат, дар толори Раёсати Қӯшунҳои зудамали Қувваҳои Мусаллаҳи Ҷумҳурии Тоҷикистон чорабинии ҳарбӣ-сиёсӣ баргузор гардид. Дар чорабинии мазкур масъулини Қӯшунҳои зудамал, намояндагони Кумитаи забон ва истилоҳоти назди Ҳукумати Ҷумҳурии Тоҷикистон иштирок намуда, ба ин чорабинии тантанавӣ ҳусну таровати хосаи маънавӣ бахшиданд.
Дар оғози ҷамъомад масъулини ин навъи қӯшуни Артиши миллии мамлакат баромад намуда, зимнан оид ба нақш ва аҳамияти забони давлатӣ дар ташаккули инсон ҳамчун шахсияти комил ибрози андеша намуданд. Ҳамчунин қайд карда шуд, ки дар ҳама давру замон, забони давлатӣ ҳамчун рукни давлатдорӣ буда, сарчашмаи асосии Истиқлолияти миллӣ ва омили ташаккули инсоният маҳсуб меёбад. Аз ҷониби дигар баромадкунандагон низ, забони давлатӣ ҳамчун пайкара ва симои миллат маънидод шуда, ҷаҳони маънавӣ ва хираду маърифати ҳама қавму халқият арзёбӣ гардид.
Ҳамин гуна ҷамомади бошукӯҳ бахшида ба Рӯзи забони давлатӣ дар Прокуратураи ҳарбии гарнизони Душанбе низ бо иштироки масъулин ва ҳайати кормандони ин ниҳод доир гардид. Иштирокчиёни ҷамъомад вобаста ба саҳми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар рушди Забони давлатӣ ва татбиқи сиёсати ҳадафмандонаи ҳукумат дар ин самт суханронӣ намуда, таъкид карданд, ки Забони давлатӣ низ яке аз рамзҳои хоси давлатдорӣ буда, пос доштани ин муқаддасот барои ҳар як фарди ҷомеа аз вазифаи муҳиму аввалиндараҷа маҳсуб меёбад. Зеро, забони давлатии мо ба мисли дигар муқаддасоти милливу давлатӣ бузургтарин арзиши олӣ, симои воқеии давлату миллат ва муаррифгари фарҳангу тамаддуни миллӣ мебошад.
Боқӣ ШАРИФОВ,
майор
