Аз якуми апрели соли 2023-юм дар мамлакат даъвати навбатии шаҳрвандон ба сафи Қувваҳои Мусаллаҳи Ҷумҳурии Тоҷикистон муташаккилона идома дошта, масъулини комиссияҳои даъватии аксари шаҳру ноҳияҳои ҷумҳурӣ ва мақомоти вобастаи ин чорабинии муҳими сиёсӣ дар самти даъвату гусели ҷавонписарон ба хизмати ҳатмии ҳарбӣ ба муваффақиятҳои назаррас ноил гардиданд.
Аз ҷумла, бо оғоз гардидани даъвати баҳории шаҳрвандон ба хизмати ҳарбӣ дар нахустин рӯзи даъват, аввалин шуда дар ҷумҳурӣ, шаҳру навоҳии вилояти мухтори кӯҳистони Бадахшон аз иҷрои пурраи нақшаи пешбинишуда гузориш доданд. Тайи чанд соли охир аст, ки ин вилоят иҷрои нақшаро дар мамлакат пеш аз мӯҳлат ва дар рӯзҳои нахустини ин маъракаи муҳими сиёсӣ, аввалин шуда дар ҷумҳурӣ ба итмом мерасонад.
Дар баробари дигар шаҳру навоҳии мамлакат, гусели сарбозони ояндаи Ватан дар шаҳри Душанбе низ аллакай пурра ба анҷом расида, чаҳор навоҳии пойтахт то охири моҳи апрел нақшаи пешбинишударо 100 фоиз иҷро намуданд.
Дар давоми як моҳи ҷараёни ин маъракаи муҳими сиёсӣ ноҳияҳои Лахш, Нуробод, Рашт, Тоҷикобод ва Сангвору шаҳри Ваҳдат аз анҷоми даъвати баҳории шаҳрвандон ба хизмати ҳатмии ҳарбӣ гузориш дода, иҷрои нақша дар шаҳру ноҳияҳои тобеи ҷумҳурӣ то имрӯз ба наздики 70 фоиз баробар мебошад.
Натиҷаи фаъолияти хуби масъулини мақомоти вобастаи даъватӣ дар вилояти Хатлон аст, ки ноҳияҳои Вахш, Фархор ва Данғара даъвату гусели ҷавонписарони синни даъватиро пурра ба анҷом расонида, иҷрои нақша дар ин вилоят наздик ба 60 фоизро ташкил медиҳад.
Бо ҳамин тартиб, чорабинии гусели муҳофизони ояндаи Ватан дар вилояти Суғд 45 фоиз ва дар давоми як моҳи ҷараёни ин маъракаи муҳими сиёсӣ, дар тамоми қаламрави ҷумҳурӣ, он ба 63 фоиз баробар мебошад.
Қобили зикр аст, ки омилҳои пеш аз мӯҳлат дар бисёре аз шаҳру ноҳияҳои мамлакат иҷро гардидани нақшаи даъват агар аз як тараф ин ба пойдории фазои сулҳу суботи Тоҷикистони маҳбуб, дастгириву ғамхориҳои пайвастаи давлату ҳукумати ҷумҳурӣ нисбат ба Артиши миллӣ, бунёди заминаҳои хуби модиву таълимӣ дар ҷузъу том ва ба таъмини ҳамаҷонибаи шароити хизмативу майишӣ вобастагӣ дошта бошад, аз ҷониби дигар ин ба зиёд будани шумораи ҷавонони масъулиятшиносу ватандӯст ва фаъолияти хубу назарраси комиссияҳои даъватӣ арзёбӣ мешавад, ки хушбахтона шаҳрвандони мамлакат имкон доранд, ки дар муҳити орому осоишта ва дар Ватани азизи худ хизмати пуршарафи Модар-Ватанро адо намоянд.
Маркази матбуоти
Вазорати мудофиаи
Ҷумҳурии Тоҷикистон
