Ҷамъомади таҳлилӣ оид ба натиҷаҳои даъвати тирамоҳии шаҳрвандон ба хизмати ҳарбӣ, дар толори Вазорати мудофиа низ баргузор гардид, ки дар он сардори Ситоди генералии Қувваҳои Мусаллаҳ-муовинони вазири мудофиа ва дигар масъулини раёсатҳои дахлдори ин ниҳоди қудратӣ баромад карда, даъвати баҳориву тирамоҳии шаҳрвандон ба хизмати ҳарбиро дар соли 2021, мавриди баррасӣ қарор доданд.
Ҳамзамон, оид ба вазъи қонунияту тартиботи ҳуқуқӣ, пешгирӣ намудани сатҳи содиршавии ҷинояткорӣ, омӯзиши шумораи захираҳои сафарбарӣ, муайян ва мушаххас намудани теъдоди дақиқи онҳо ҳангоми баргузогии машғулиятҳои таълимӣ, баланд бардоштани масъулият ва вазифаву уҳдадориҳои иштирокчиёни он, сафарбарии техникаҳои хоҷагии халқ, дар пойгоҳи тамоми комиссариатҳои ҳарбӣ муҷаҳҳаз намудани нуқтаҳои идоракунӣ, тақвият бахшидани мудофиаи ҳудудӣ, тибқи талаботи ойинномаҳо ва дигар ҳуҷҷатҳои роҳбарикунанда ташкили пайвастаи дарсҳои соҳавӣ ва дигар масъалаҳои марбут ба фаъолияти комиссияҳои давлатиро дар самти баргузории чорабиниҳои даъватии шаҳрвандон ба хизмати ҳатмии ҳарбӣ, ҳамаҷониба таҳлилу натиҷагирӣ намуданд.
Роҳбарияти Вазорати мудофиаи мамлакат зимни суханронӣ, нахуст оид ба дастуру супоришҳои
Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки дар Паёми навбатӣ ба Маҷлиси Олӣ ироа гардида буд, таваҷҷуҳи хосса зоҳир намуда, ҳамзамон вобаста ба масъалаҳои беҳтару сифатан хуб ташкилу ба роҳ мондани чорабиниҳои даъватии шаҳрвандон ба хизмати ҳарбӣ ибрози назар кард. Дар ин замина, таъкид карда шуд, ки масъулини дахлдор дар навбати аввал тамоми камбудиҳои ҷойдоштаро пурра бартараф намуда, ҳамкориро бо мардум ва аҳли ҷомеа боз ҳам тақвият бахшанд. Илова бар ин, дар ҳамоҳангӣ бо мақомотҳои дахлдори шаҳриву ноҳияҳо ба масоили омӯзиши шахсияти даъватшавандаҳо, дуруст муйаян кардани маҳали хизматии шаҳрвандони оиладор, ташкили корҳои сафарбарӣ, тайёрии ҳамаҷонибаи комиссариатҳои ҳарбӣ ба соли нави омӯзиш, сифатан хуб ба роҳ мондани чорабиниҳои 
даъватӣ, пешгирӣ намудани сатҳи содиршавии ҳар гуна қонуншиканиҳо ба хусус, ҷиноятҳои хусусияти коррупсионидошта ва бо масъулияти баланд муносибат намудан дар самти иҷрои нақшаи даъвати пешомад диққати ҷиддӣ равона карда шавад.
Дар охир, бо фармоиши роҳбарияти Вазорати мудофиа комиссарони ҳарбие, ки дар даъвати баҳориву тирамоҳии соли 2021, нақшаи ба онҳо пешбинигардидаро дар доираи талабот ва дар сатҳи зарурӣ ба анҷом расонидаанд, бо ифтихорномаву раҳматномаҳо ва дигар туҳфаҳои хотиарвӣ сарфароз гардонида шуданд. Ҳамзамон, масъулини комиссариатҳои ҳарбие, ки зимни ташкили ин чорабинии муҳими сиёсӣ, баръакс ба саҳлангорӣ роҳ додаву хунукназарӣ зоҳир намуда буданд, ба ҷазоҳои интизомӣ кашида шуданд.
Фаридун МАҲМАДАЛИЗОДА,
сардори Маркази матбуот,
полковник
