Тайи солҳои соҳибистиқлолӣ ҳукумати мамлакат ба наврасону ҷавонон ҳамчун нерӯйи созандаву бунёдкор ва муҳофизи халқу Ватан таваҷуҳи хоса зоҳир намуда, бо мақсади рушду камоли шахсият ва солимии ҷомеа тадбирҳои гуногунро дар ин самт амалӣ мекунад. Маҳз дар доираи ин ҳадафҳо ва густариш додани навъҳои варзиш дар сафи Артиши миллӣ, 13-уми марти соли 2003 дар тобеияти Вазорати мудофиа Клуби марказии варзишии Артиш ташкил карда шуд.
Агар ба солҳои аввали фаъолияти Клуби марказии варзишии Артиши Вазорати мудофиа назар кунем, дар ин давра клуби мазкур фаъолияти худро дар заминаи дастаи мунтахаби футболбозонаш оғоз бахшида, сол ба сол навъҳои дигари варзишро роҳандозӣ намудааст. Акнун бошад, бо гузашти вақту имкониятҳои фароҳамгашта дар он сарбозони варзишгар аз руйи 10 навъи варзиш таълим гирифта, дар давоми хизмати ҳарбӣ маҳорати варзишии худро сайқал медиҳанд. Аз ин рӯ, вобаста ба сайқали маҳорати варзишии хизматчиёни ҳарбии Артиши миллӣ қайд кардан ба маврид аст, ки дар пойгоҳи қисму воҳидҳои ҳарбӣ низ барои ҳайати шахсӣ ҷиҳати машқу тамрини ҷисмонӣ шароиту имкониятҳои хуб фароҳам оварда шудааст.
Бо дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоџикистон, мӯҳтарам Эмомалӣ Раҳмон тамоми қисмҳои ҳарбии Вазорати мудофиа бо толорҳои варзишӣ ва майдончаҳову шаҳрчаҳои варзишӣ муџаҳҳаз гардонида шудааст, ки сарбозон дар онҳо тамрин мекунанд ва дар мусобиқаҳои џумҳуриявӣ, ки байни ротаҳо, взводҳо ва баталёнҳову полкҳо гузаронида мешавад, дар сатҳи баланд иштирок мекунанд.
Айни ҳол дар Клуби марказии варзишии Артиш навъҳои варзиши гӯштини тарзи миллӣ, озод, самбо, дзюдо, дастхобонӣ, бокс, задухурди тан ба тан, футбол, волейбол ва ғайра фаъолият мекунад. Ҳар моҳ дар қисмҳои ҳарбӣ як ё ду маротиба аз рӯйи ин навъи варзишҳо мусобиқаҳои варзишӣ гузаронида мешаванд ва сарбозони џузъу томи артиш дар он фаъолона иштирок менамоянд
Ҳамасола масъулини ин Клуб мусобиқаҳои гуногуни варзиширо дар шаҳру навоҳии ҷумҳурӣ мувофиқи нақша ва дар арафаи иду ҷашнҳои миллӣ миёни афсарону сарбозони қисмҳои ҳарбии Вазорати мудофиа ва навъҳои қӯшуни Қувваҳои Мусаллаҳ доир менамоянд.
Соли гузашта барои варзишгарони Клуби мазкур бо иштирок дар мусобиқаҳои гуногуни дохиливу хориҷӣ соли хотирмону фаромӯшнашаварда буд. Тибқи иттилои масъулин, соли сипаришуда варзишгарон дар 53 мусобиқа иштирок намуда, бо 141 медал сазовор гаштанд. Ин нишондод назар ба соли 2021 хело назаррас аст ва варзишгарон дар ин сол 75 медал зиёдтар нисбат ба соли қабл ба даст овардаанд.
Бояд гуфт, ки яке аз дастоварди назарраси Клуби марказии варзишии Артиши Вазорати мудофиа дар соли сипаригардида ин иштирок дар Ҷоми Конфедератсияи футболи Осиё ва мақоми сеюмро касб намудани дастаи футболбозони Клуби мазкур дар чемпионати Тоҷикистон мебошад. Дастаи футболбозони Клуби марказии варзишии Артиш аз замони ташкилшавӣ то имрӯз фаъолияти мунтазаму босамар дошта, бо иштирок дар Чемпионати Лигаи олии футболи Тоҷикистон дар байни дастаҳои футболи кишвар мақоми хосса доранд.
Тибқи иттилои Сардори Клуби марказии варзишии Артиши Вазорати мудофиа, имрӯз ҷавонони варзишгар бо пешниҳоди унвонҳои варзишӣ метвонанд, ба сафи Артиши миллӣ омада, дар баробари хизмати ҳарбӣ дар клуби мазкур маҳорати варзишии худро такмил диҳанд. Ҳамзамон, дар мусобиқаҳои гуногуни дохилу хориҷи мамлакат ширкат варзида, соҳиби ҷойҳои ифтихорӣ гарданд.
Тамринҳои пайваста, обутоби бадан, баланд бардоштани маҳорати ҷисмонӣ ва дар маҷмӯъ, беҳдошти солимии ҳайати шахсии Артиши миллӣ ин як самти асосии омодагии ҷангӣ ба ҳисоб меравад. Бо ин мақсад, масъулини Клуби мазкур пайваста миёни ҳайати шахсии Вазорати мудофиа мусобиқаҳои гуногуни варзиширо ташкилу роҳандозӣ менамоянд.
Масъулини ин Клуби варзишӣ дар соли равон нақша доранд, ки дар баробари ташкилу баргузории мусобиқаҳои гуногуни варзишӣ дар байни хизматчиёни ҳарбӣ, ҳамчунин ҷиҳати муаррифии давлату миллат дар арсаи ҷаҳонӣ дастаҳои варзиширо барои иштирок дар мусобиқаҳои байналмиллалӣ, дар сатҳи баланд омода намоянд.
Боқӣ ШАРИФОВ
