Дар Қувваҳои Мусаллаҳи Ҷумҳурии Тоҷикистон ду давраи омӯзишӣ амал мекунад, ки даври якуми таҳсил барои хизматчиёни ҳарбӣ аз аввали моҳи январ то охири моҳи майро дар бар гирифта, даври дуюми он бошад аз моҳи июл то ноябр ҷараён мегирад. Моҳҳои июн ва декабр давраи таътили низомиён ба ҳисоб меравад, ки дар ин давра барномаҳои таълимӣ ба анҷом расида, афсарону сарбозон асосан ба ҷамъомадҳои методӣ-таълимӣ ва дигар машғулиятҳои соҳавӣ ҷалб карда мешаванд. Ҳайати шахсии сарбозони қисми ҳарбии 07033-и Қувваҳои ҳарбӣ ҳавоӣ ва мудофиаи зидди ҳавоии Қувваҳои Мусаллаҳи Ҷумҳурии Тоҷикистон дар баробари иштирок дар ин гуна ҷамъомадҳо ва дар баробари пешбурди хизмати рӯзмарраву такмили маҳорати оинномавии хизмат, инчунин вақтҳои холигии хешро бо ташкилу баргузории чорабиниҳои фарҳангиву фароғатӣ, ҳарбӣ-ватандӯстӣ, варзишӣ ва корҳои ободониву созандагӣ сипарӣ менамоянд. Бо истифода аз муҳити созгору шароити фароҳам дар маҳалли пешбурди хизмати ҳарбӣ бошад, гурӯҳи дигари сарбозон хондани китоб ва рӯзномаву маҷаллаҳоро аз машғулиятҳои ҳамешагии худ медонанд.
Китобдориву китобхонӣ яке аз одатҳои ҳамида ва амали басо ҳам шоистаи мардуми мо ба ҳисоб рафта, боис бар он гардидааст, ки дар саросари ҷаҳон мо ҳамчун миллати фарҳангдӯсту тамаддунофар муаррифӣ гардем. Дар замони соҳибистиқлолӣ таҳти сиёсати хирадмандонаи Пешвои миллат муҳтарам Эмомалӣ Раҳмон, новобаста аз пешрафти илму технология ва навовариҳо дар ин самт, халқи тоҷик ҳамоно ин анъанаи муҳим ва рисолати бузургро идома дода, дар заминаи донишу фарҳанги волои инсонӣ насли худро дар рӯҳияи худогоҳиву хештаншиносӣ, дӯст доштани халқу Ватан, эҳтиром ба ҳама арзишҳои милливу давлатӣ ва ҳифзи суботу оромии кишвар тарбия менамояд.
Артиши миллӣ, ки дар мактаби мардонагиву садоқатофаринии он ҷавонони сарбози Ватан дарси ҳимоя аз марзу буми аҷдодӣ ва ҳифзи дастовардҳои даврони соҳибистиқлолии кишварро меомӯзанд, имрӯз дар ҳамаи ҷузъу томи он вобаста ба китобдориву китобхонӣ иқдомҳои наҷибу саривақтӣ амалӣ карда мешавад.
Сарбоз Фаромарз Илёсов беш аз се моҳ аст, ки дар ин қисми ҳарбӣ хизматро пеш мебарад. Ӯ дорои маълумоти олӣ буда, аз замони хизматро оѓоз намудан дар ин қисми ҳарбӣ аз рӯйи завқу хоҳиш ва донишу таълимоти волояш ба ҳайси китобдор таъйин гардидааст. Номбурда дар баробари иҷрои дигар вазифаҳои хизматӣ ва омӯзиши машѓулиятҳои пешбинигардидаи низомӣ, ҳамзамон бо иҷрои ин рисолат дар таъмини ҳолати равонӣ, баланд бардоштани донишҳои ҳуқуқиву сиёсӣ ва ахлоқии ҳамхизматонаш саҳмгузор мебошад.
Албатта, шахси масъули китобхона сараввал бояд худ соҳибхираду соҳибзаковат бошад ва дар баробари ин нисбат ба китоб ѓамхорӣ карда тавонад. Барои мусоидат дар таъмини талаботи маънавии хонандагон аз тамоми имкониятҳои мусоид истифода намояд, таъкид кард зимни сӯҳбат бо мо сарбози қаторӣ Фаромарз Илёсов.
Қобили зикр аст, ки дар тозаву озода нигоҳ доштани китобҳо ва дарёфту ба хонанда саривақт пешниҳод намудани онҳо саҳми китобдор ё худ китобхоначӣ хеле назаррас аст.
Воқеан, китоб барои ҳар як шахс муҳитарин ва асоситарин сарчамшмаи донишу маърифат ва василаи худогоҳиву хештаншиносӣ ба ҳисоб рафта, дар ташаккули шахсият ва рушди тафаккури инсонӣ нақши бориз дорад. Хушбахтона, дар замони соҳибистиқлолии мамлакат ба масоили таъминоти ахлоқиву рӯҳияи хизматии афсарону сарбозон таваҷҷӯҳи хоса зоҳир гардида, дар ин росто бобати бедор намудани эҳсоси ватандорӣ ва худогоҳиву хештаншионсии хизматчиёни ҳарбӣ дар пойгоҳи тамоми қисму воҳидҳои низомӣ дар баробари дигар бинову иншооти муҳими хизматрасонӣ, китобхонаҳо бо толори хониш, осорхонаҳои ҳарбӣ ва дигар иншоотҳои фароѓативу маишӣ сохта ба истифода дода шудаанд, ки аз ҷониби ҳайати шахсӣ ба таври васеъ мавриди баҳрабардорӣ қарор доранд.
Умуман, бо шарофати соҳибистиқлолӣ ва дар заминаи таваҷҷуҳи доимии Пешвои миллат, Сарфармондеҳи Олии Қувваҳои Мусаллаҳ генерали артиш муҳтарам Эмомалӣ Раҳмон нисбат ба хизматчиёни ҳарбӣ, барои ҳар як афсару сарбози Ватан шароиту имконоти хуби хизматӣ ва таълимиву таҷрибавӣ фароҳам оварда шудааст. Ҳомиёни далеру матиниродаи меҳан бо имконоти дар даст дошта тамоми нозукиву махсусиятҳои хизмати пурмасъули ҳарбиро аз худ намуда, минбаъд вазифаҳои бар уҳдадоштаро муваффақонаву сарбаландона иҷро менамоянд.
Боқӣ ШАРИФӢ
