Дар Вазорати мудофиаи Ҷумҳурии Тоҷикистон бо иштироки ҳайати роҳбариву фармондеҳии Қувваҳои Мусаллаҳ ва дигар сохторҳои низомии кишвар доир ба масъалаи тарҳрезӣ намудани сару либоси хизматчиёни ҳарбии Қувваҳои Мусаллаҳ ва кормандони мақомоти ҳифзи ҳуқуқ дар шакли ягонаи миллӣ машварати корӣ баргузор шуд.
Қаблан намояндагони Дастгоҳи иҷроияи Президенти Ҷумҳурии Тоҷикистон ва ҳайати роҳбариву фармондеҳии Артиши миллӣ аз намунаи сару либоси пешниҳодгардида ба афсарону прапоршикон ва сержантону сарбозон дар фаъолияти ҳамарӯза, ки аз ҷониби Вазорати мудофиа дар якҷоягӣ бо мутахассисони соҳа омода ва пешниҳод карда шудааст, дидан намуданд.
Машварати кории навбатӣ, ки бо иштироки намояндаи Шӯрои амнияти Ҷумҳурии Тоҷикистон, ҳайати роҳбариву фармондеҳии Вазорати мудофиа, Гвардияи миллӣ, Кумитаи ҳолатҳои фавқулодда ва мудофиаи гарждании назди Ҳукумати Ҷумҳурии Тоҷикистон, Қӯшунҳои сарҳадии Кумитаи давлатии амнияти миллӣ, Қӯшунҳои дохилии Вазорати корҳои дохилӣ, Сарраёсати иҷрои ҷазои ҷиноии Вазорати адлияи Ҷумҳурии Тоҷикистон, фармондеҳони навъҳои қӯшуни Қувваҳои мусаллаҳ ва дигар сохторҳи низомии кишвар доир гардид, зимни он масъалаҳои дахлдор оид ба иҷрои дастуру супоришҳои Сарфармондеҳи Олии Қувваҳои Мусаллаҳи Ҷумҳурии Тоҷикистон, генерали артиш муҳтарам Эмомалӣ Раҳмон дар самти тарҳрезї намудани сару либоси хизматчиёни ҳарбии Қувваҳои Мусаллаҳ ва кормандони мақомоти ҳифзи ҳуқуқи кишвар дар шакли ягонаи миллӣ мавриди таҳлилу баррасӣ ва омӯзиши ҳамаҷониба қарор гирифт.
Дар оғози машварати корӣ аз ҷониби роҳбарияти Вазорати мудофиа ба ҳама иштирокчиён ҷиҳати ширкат дар баррасии масъалаи муҳиме, ки ба фаъолияти ҳамарӯзаи Қувваҳои мусаллаҳ ва нуфузу эътибори хизмати ҳарбӣ дар байни аҳолӣ алоқамандӣ дорад, миннатдорӣ баён карда шуд.
Зимнан қайд гардид, ки тайи солҳои соҳибистиқлолӣ, марҳила ба марҳила дар сохторҳои ҳарбии мамлакат тартиби пӯшидани сару либоси низомӣ ба танзим дароварда шуда, дар умум намуди ягонаи сару либоси ҳарбӣ ҷорӣ гардида бошад ҳам, аммо имрӯз мутобиқгардонии сару либоси ҳамарӯзаи хизматчиёни ҳарбӣ ва дигар кормандони сохторҳои қудратӣ ба шароити иқлимии Тоҷикистон аз интихоби намуди матоъ ва тарзи дурусти дӯхти он, аз иқдомҳои наҷибонаи роњбарияти давлату Ҳукумати кишвар маҳсуб меёбад, ки дар замиани таваҷҷуҳу дастгириҳои доимии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбат ба хизматчиёни ҳарбии Артиши миллӣ ва кормандони мақомоти ҳифзи ҳуқуқи мамлакат амалӣ карда мешавад.
Дарвоқеъ, сару либоси низомӣ, ки онро хизматчёни ҳарбии Қувваҳои Мусаллаҳ, ҳайати шахсии сохторҳои қудратиӣ ва мақомоти ҳифзи ҳқуқуқ ба бар менамоянд, натанҳо рамзи ифтихору шарафмандӣ, балки таҷассумгари симоии воқеии давлату миллат дар арсаи байналмилалӣ ба шумор меравад.
Аз ин хотир, дар интихоби сару либоси нав ва дӯхти он ҳама меъёрҳои ҳатмии ҳарбӣ бо риояи унсурҳои миллӣ ба инобат гирифта шудааст.
Маркази матбуот ва иттилооти
Вазорати мудофиаи Ҷумҳурии Тоҷикистон
