Дар кори конференсия намояндагони Вазорати мудофиа, Донишкадаи ҳарбии Вазорати мудофиа, ҳайати шахсии Қувваҳои Мусаллаҳ ва коршиносони соҳаи ҳуқуқ ва сиёсат иштирок намуданд.
Конференсияро бо сухани ифтитоҳӣ Муовини Вазири мудофиаи Ҷумҳурии Тоҷикистон ифтитоҳ намуда, таъкид кард, ки Конститутсияи Ҷумҳурии Тоҷикистон ҳамчун қонуни асосии давлат, пояи мустаҳками ташаккули низоми ҳуқуқӣ ва сиёсӣ мебошад. Маҳз дар асоси он принсипҳои қонуният, ваҳдати миллӣ ва амнияти давлатӣ таҳким ёфта, заминаи ҳуқуқии таъсис ва фаъолияти Қувваҳои Мусаллаҳи кишвар гузошта шудааст.
Дар ҷараёни ҳамоиш маърӯзаҳои илмӣ-назариявӣ аз ҷониби олимон ва мутахассисон пешниҳод гардиданд, ки дар онҳо масоили таърихӣ, ҳуқуқӣ ва сиёсӣ вобаста ба нақши Конститутсия дар таҳкими истиқлолияти давлатӣ, таъмини суботи сиёсӣ ва рушди низоми дифоии кишвар мавриди таҳлил қарор гирифт.
Зикр гардид, ки Қувваҳои Мусаллаҳи Ҷумҳурии Тоҷикистон ҳамчун ниҳоди асосии ҳифзи соҳибихтиёрӣ, истиқлолият ва амнияти миллӣ, дар рӯҳияи садоқат ба Конститутсия ва Президент — Сарфармондеҳи Олии Қувваҳои Мусаллаҳ тарбия ёфта, имрӯз ба ҳайси сипари боэътимоди давлату миллат амал менамоянд.
Дар анҷоми конференсия аз ҷониби иштирокчиён як қатор пешниҳодҳо ҷиҳати таҳкими минбаъдаи заминаҳои ҳуқуқии фаъолияти Қувваҳои Мусаллаҳ, баланд бардоштани сатҳи омӯзиши Конститутсия дар байни ҳайати шахсӣ ва тақвияти маърифати ҳуқуқии шаҳрвандон пешниҳод гардиданд.
Конференсия дар фазои созандагӣ ва рӯҳияи баланди ватандӯстӣ ҷамъбаст гардид.
Раёсати иттилоот ва робита бо ҷомеаи
Вазорати мудофиаи Ҷумҳурии Тоҷикистон
