Рӯзи парчами давлатии Ҷумҳурии Тоҷикистон ё худ ин ҷашни умумимиллиро дар қатори мардуми шарафманди Ватани азизамон низомиёни мамлакат низ бо як шукӯҳу шаҳомати хоса таҷлил намуданд.
Ба ин муносибат дар Вазорати мудофиаи кишвар бо иштироки ҳайатҳои роҳбариву фармондеҳӣ, хизматчиёни ҳарбии ҷузъу томи ин ниҳоди қудратӣ ва намояндаи Академияи миллии илмҳои Тоҷикистон ҷамъомади тантанавӣ доир гадид.
Дар оғоз, роҳбарияти Вазорати мудофиаи мамлакат, иштирокчиёни ҷамъомад ва дар симои онҳо тамоми хизматчиёни ҳарбии Артиши миллиро бо солгарди рӯзи Парчами давлатӣ самимона шодбош гуфта, аз таърихи парчамдории ниёгонамон, эҳтироми он ва аз аҳамияти бузурги парчам дар низоми давлатдории тоҷикон ёдоварӣ намуданд. Дар ҷараён зикр карда шуд, ки Парчами давлатӣ нишон аз пойдорӣ ва соҳибихтиёрии давлат аст. Аз ин рӯ, арҷгузорӣ нисбат ба он, муқаддас шуморидан ва эҳтиром гузоштан вазифаи ҳар як фарди ҷомеа, алалхусус афсарону сарбозони Артиши миллӣ мебошад. Ҳамчунин, қайд кард шуд, ки мувофиқи Оинномаҳои умумиҳарбии Қувваҳои Мусаллаҳ дар қисму воҳидҳои низомӣ низ байрақи ҷангӣ нигоҳ дошта мешавад ва ҳар як хизматчии ҳарбӣ ҳамчун нишони садоқату вафодорӣ ба халқу Ватани хеш байрақи ҷангии қисми ҳарбии худро эҳтиром намуда, қасам ёд мекунад, ки вазифаҳои хизматиашро мардонавор ва бо сари баланд ба ҷо меорад.
Боиси ифтихору шарафи бузург аст, ки маҳз бо ташаббуси Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон мардуми шарифи Тоҷикистон санаи қабули Парчами давлатиро аввалин маротиба 24-уми ноябри соли 2009-ум ҳамчун ҷашни умумимиллӣ қайд намуданд. Ва ин рӯйдоди фараҳбахш бори дигар аз соҳибтамаддуниву фарҳангсолории халқи мо дарак дод. Воқеан, Парчами давлатӣ яке аз рамзҳои хоси давлатдории мустақили миллӣ буда, эҳтиром ва арҷгузорӣ нисбат ба ин арзиши олӣ вазифаи ҳар як фарди худогоҳу хештаншиноси кишвар мебошад.
Умуман, қайд кардан ба маврид аст, ки ба ифтихори Рӯзи Парчами давлатии Ҷумҳурии Тоҷикистон дар тамоми ҷузъу томҳои Вазорати мудофиаи мамлакат, муассисаҳои таълимии ҳарбӣ, қисму воҳидҳои алоҳидаи низомӣ, Раёсатҳои навъи қӯшуни Қувваҳои Мусаллаҳ ва қисмҳои ҳарбии тобеи онҳо ҷамъомади тантанавӣ, конфронсҳои илмӣ — назариявӣ, чорабиниҳои гуногуни сиёсӣ ва фарҳангиву варзишӣ баргузор гардиданд.
Боқӣ ШАРИФОВ,
майор
