Дастгирии ятимону бепарасторон ва нафарони эҳтиёҷманд яке аз самтҳои асосии сиёсати пешгирифтаи давлату ҳукумати мамлакат, бахусус Пешвои муаззами миллат, муҳтарам Эмомалӣ Раҳмон ба ҳисоб меравад.
Ин аст, ки ҳамасола дар арафаи иду ҷашнҳои давлатӣ ин қишри ҷомеа аз ҷониби давлат ва афроди хайрхоҳ мавриди дастгирӣ ва ғамхорӣ қарор мегиранд.
Масъулини Раёсат оид ба корҳои сиёсӣ-тарбиявии Вазорати мудофиаи мамлакат низ бахшида ба 31-умин солгарди Истиқлолияти давлатии Ҷумҳурии Тоҷикистон ятимони кулле, ки дар гарнизонҳои Душанбеву Хатлон адои хизмат менамоянд, сарҷамъ намуда, тасмим гирифтаанд, то баҳри онҳо як рӯзи хубу хотирмонро ҳадя созанд.
Воқеан, он рӯз чеҳраи ин гурӯҳи сарбозонро, ки бо амри тақдир сояи лутфу инояти падару модар аз сарашон дур гардидаасту аз навозишу меҳрубонии волидон бебаҳра мондаанд, шодиву нишот ва хушбахтиву хурсандӣ фаро гирифта буд.
Маврид ба зикри хост аст, ки имрӯз дар ҷузъу томи Вазорати мудофиаи мамлакат наздики 110 нафар ятимони кулл адои хизмат менамоянд ва онҳо таҳти ғамхории пайвастаи давлату ҳукумат ва роҳбарияти Вазорати мудофиа қарор доранд. Ҳамзамон аз тарафи сарпарастони вобастагардида аз ҳисоби муовинони вазир ва сардорони раёсатҳо дар арафаи иду ҷашнҳо ба онҳо кӯмакҳои моддиву ғизоӣ расонида мешавад. Баъди адои хизмат низ агар хоҳиши фаъолият дар мақомоти қудратӣ дошта бошанд, баъди гузаштан аз курсҳои кӯтоҳмуддат ва мактаби прапоршикӣ бо ҷойи кори доимӣ ва маоши хуб таъмин мегарданд. То имрӯз ҳазорон нафар ятмону бепарасторон хизмати ҳарбиро сарбаландона адо намуданд, ки аллакай як қисми онҳо дар сохторҳои қударатӣ ва мақомоти ҳифзи ҳуқуқ кору фаъолият намуда истодаанд.
Илова бар ин, ба ятимони кулл барои дохил шудан ба Литсейи ҳарбӣ ва Донишкадаи ҳарбӣ низ имтиёзҳо пешбинӣ гардидааст. Ҳангоми нарасидани холҳои дохилшавӣ ба онҳо холҳои иловагӣ дода мешавад. Ҳамзамон, баъди хатми литсей ё худ донишкада сараввал онҳо ба донишгоҳҳои ҳарбии хориҷи кишвар равона мегарданд.
Масъулини вобастагардида, сарбозонро сараввал дар Осорхонаи миллӣ, бо таърихи гузашта ва пурифтихори миллати тоҷик шинос намуданд. Онҳо зимни боздид аз осорхона бо мавзеъҳои таърихӣ, ҳунарҳои қадимаи мардуми тоҷик, давлатдории бузурги тоҷикон, дастовардҳои даврони соҳибистиқлолии кишвар ва корнамоиҳои диловаронаи фарзандони қаҳрамони халқи тоҷик ошноӣ пайдо намуданд.
Баъди боздид аз осорхона ҳайати иштирокчиён ба мавзеи “Қалъаи Ҳисор”-и шаҳри Ҳисор раҳсипор шуданд. Дар даромадгоҳи “Қалъаи Ҳисор” ҳунармандони бахши фарҳанги шаҳр меҳмононро бо садои карнаю сурнай истиқбол намуданд.
Сарбозон ва афсарони масъули онҳоро ҳамроҳикунанда ба гурӯҳҳо ҷудо шуда, аз мавзеъҳои тамошобоби “Қалъаи Ҳисор” дидан намуданд. Масъулин ҳайати иштирокчиёнро аз ҷойҳои таърихии ин мавзеъ ва бо таърихи пайдоши он ошно сохтанд.
Ҳамзамон, бо ташаббуси Мақомоти иҷрояи ҳокимияти давлатии шаҳри Ҳисор бахшида ба ҷашни Истиқлоли давлатӣ ба ин гурӯҳи сарбозони Ватан дастархони идона густурда шуда, ҳамзамон аҳли санъати шаҳр бо иҷрои таронаҳои ватандӯстона табъи ҳозиринро болида гардониданд.
Шоҳин ШАРИФОВ,
рӯзноманигор
