Дар доираи силсилаи рӯйдодҳои ҳафта, ҳамчунин дар қисми ҳарбии 6593-и Сарраёсати иҷрои ҷазои ҷиноии Вазорати адлияи Ҷумҳурии Тоҷикистон вохӯрии намояндагони Маркази тадқиқоти стратегии назди Президенти Ҷумҳурии Тоҷикистон, Сарпрокуратураи ҳарбӣ, Суди ҳарбии гарнизони Душанбе ва дигар олимону донишмандон бо ҳайати шахсии ин қисми ҳарбӣ доир гардид, ки мақсад аз он баланд бардоштани маърифати сиёсӣ ва зиракиву ҳушёрии афсарону сарбозон мебошад.Меҳмонон дар назди ҳайати шахсӣ аз моҳияти Ваҳдати миллӣ, нақши Истиқлолу озодӣ дар ҳаёти ҷомеа ва хусусияти суботи сиёсӣ сухан гуфта, дар ин раванд, хизмат ба халқу сарзамини аҷдодиро шарафи ҷавонмардӣ арзёбӣ намуданд.
Намояндагони мақомоти Прокуратураи ҳарбӣ ва Суди ҳарбӣ бошанд, бо таҳлилу натиҷагирӣ аз вазъи қонуният, тартиботи ҳуқуқӣ ва интизоми ҳарбӣ дар қисму воҳидҳои низомӣ қайд карданд, ки интизоми намунавии хизматӣ шарти аввали меъёрҳои қонунҳои амалкунанда ва ойинномаҳои Қувваҳои Мусаллаҳи Ҷумҳурии Тоҷикистон буда, иҷрои дақиқи он вазифаи аввалиндараҷаи ҳар як афсару сарбоз мебошад. Зеро, интизоми ҳарбӣ асоси омодагии ҷангии ҷузъу томи Артиши миллиро ташкил медиҳад.
Зимни ҷамъбаст бо хушнудӣ аз 30 соли соҳибистиқлолӣ зикр карда шуд, ки хушбахтона, бо заҳмату талошҳо ва ташаббусҳои неку созандаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, кишвари азизмон натанҳо ҳамчун узви комилҳуқуқи ҷомеаи ҷаҳонӣ, балки ҳамчун узви ташаббускори ҳалли масъалаҳои глобалӣ дар арсаи ҷаҳонӣ шинохта шудааст.
Боқӣ ШАРИФЗОДА,
капитан
