Дар асоси дастуру супоришҳои Ҳукумати мамлакат ва бо мақсади иҷроиши Фармони Президенти Ҷумҳурии Тоҷикистон аз 4-уми апрели соли 2018 таҳти №1042 «Дар бораи Консепсияи сиёсати давлатии Ҷумҳурии Тоҷикистон дар соҳаи дин», чанде қабл дар Донишкадаи ҳарбии Вазорати мудофиаи мамлакат вохӯрии намояндагони Кумитаи дин, танзими анъана ва ҷашну маросим ва Кумитаи кор бо ҷавонон ва варзиш бо офсарону курсантон доир карда шуд.
Дар оғоз масъулини Донишкадаи ҳарбӣ ҳайати меҳмононро ба ин боргоҳи илми ҳарбӣ хайрамақдам гуфта, баргузории чунин чорабиниву вохӯриҳоро судманду саривақтӣ хонданд.
Намояндаи Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон, Абдулло Мирзоев-имомхатиби масҷиди ҷомеаи маҳаллаи Ободкорон ва намояндаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Амир Иброҳимзода-сардори Раёсати кор бо ҷавонони дастгоҳи марказии Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо нутқи пурмӯҳтаво баромад намуда, афсарони ояндаи мамлакатро барои садоқат ба халқу Ватан ва дӯст доштани марзуми аҷдодӣ раҳнамун сохтанд.
Дар ҷараёнӣ вохӯрӣ оид ба тарбияи ватандӯстӣ, баланд бардоштани ҳуввияти миллӣ, маърифати сиёсиву ҳуқуқӣ, пешгирии ҷинояту ҷинояткорӣ, амалҳои зиддиахлоқӣ, шомилшавии наврасону ҷавонон ба ҳизбу ҳаракатҳои иртиҷоӣ, пешгирии нашъамандӣ, пурзур намудани муброизи бар зидди терроризму экстремизм ва дигар амалҳои номатлуби ҷомеаи муосир ибрози назар карданд.
Дар фарҷоми вохӯрӣ аз ҷониби меҳмонон як қатор курсантони фаъол бо сипоснома қадрдонӣ карда шуданд.
Шоҳин ШАРИФОВ
