Волоияти қонун, пурзӯр намудани интизоми ҳарбӣ, риояи ҳатмии ойинномаҳои умумиқӯшунӣ дар Қувваҳои Мусаллаҳи мамлакат ва дар ин замина баҳри боз ҳам баланд бардоштани маърифати ҳуқуқии хизматчиёни низомӣ, аз ҷониби масъулини мақомоти пракуратураҳои ҳарбии гарнизонҳои ҷумҳурӣ, тадбирҳои муҳиму саривақтӣ амалӣ карда мешаванд.
Дар доираи нақша чорабиниҳои пешбинигардида, дар раёсати Қӯшунҳои зудамал бо иштироки намояндагони Сарпрокуратураи ҳарбии ҷумҳурӣ вохӯрӣ баргузор гардид, ки зимни он кормандони Сарпрокуратураи ҳарбӣ дар назди ҳозирин баромад намуда, доир ба самтҳои татбиқи амалии Паёми навбатии Президенти Ҷумҳурии Тоҷикистон, мӯҳтарам Эмомалӣ Раҳмон ба Маҷлиси Олӣ изҳори андешаронӣ карданд ва ҳамзамон мубориза бар зидди терроризму экстремизм ва дигар амалҳои номатлуби ҷомеаи муосирро дар шароити феълӣ хеле муҳим ва манфиатовар арзёбӣ намуданд.
Дар вохӯрӣ инчунин доир ба нақш, аҳамият ва татбиқи амалии Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025, мубодилаи афкор сурат гирифта, аз ҷумла изҳор гардид, ки имрӯз таҳдиди терроризму ифродгароӣ ба сулҳу суботи кишварҳо, таъмини ҳаёти осоиштаи мардумон, амнияту оромии як қатор давлатҳо ва пешрафти самту соҳаҳои гуногуни ҷомеаи муосир, хатарҳои ҷиддиро эҷод намудааст.
Дар прокуратураи ҳарбии гарнизони Душанбе низ баҳри дар амал татбиқ намудани Фармони Президенти Ҷумҳурии Тоҷикистон аз 1-уми марти соли 2023 “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва дар хусуси даъвати навбатии шаҳрвандони солҳои таваллуди 1996-2005-и Ҷумҳурии Тоҷикистон ба хизмати ҳарбӣ” ҷаласа баргузор гардид.
Дар ҷаласа масъулини комиссариатҳои ҳарбии ноҳияҳои шаҳри Душанбе иштирок намуда, зимни муҳокимаи масъалаҳои ба миён гузошташуда, нахуст даъвати тирамоҳии соли сипаригашта мавриди таҳлилу баррасии ҳамаҷониба қарор гирифт. Масъулини прокуратураи ҳарбии гарнизони Душанбе бо ёдоварӣ аз баъзе камбудиву норасоиҳои ошкоршудаи ин маъраки муҳими сиёсӣ дар соли сипарӣ ибрози назар карда, таъкид бар он доштанд, ки дар ҳамкорӣ бо мақомоти дахлдори шаҳриву ноҳиявӣ, ба даъвати баҳории соли равон омодагии ҷиддӣ бинанд. Аз роҳҳои ѓайриқонунӣ даъват намудани шаҳрвандон худдорӣ намоянд ва барои сифатан хуб ташкилу ба роҳ мондани ин чорабинии муҳими сиёсӣ ва дар ин радиф аз миёни шаҳрвандони мамлакат интихобу ба сафи Артиши миллӣ фиристодани ҷавононписарони солиму бардам ва болаёқат татбирҳои мушаххас андешанд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
