Дар толори маҷлисии Вазорати мудофиаи Ҷумҳурии Тоҷикистон вохӯрии сардори Раёсати танзими анъана ва ҷашну маросими Мақомоти иҷроияи ҳокимияти давлатии шаҳри Душанбе бо кормандони ин ниҳоди қудратӣ баргузор шуд.
Зимни вохурӣ таъкид гардид, ки Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ҷиҳати рӯз то рӯз беҳтару хубтар гардидани сатҳу сифати зиндагии мардум тамоми чораву тадбирҳои заруриро меандешанд, ки ҳамаи онҳо дар амал татбиқ мешаванд.
Соли 2007-ум қабул гардидани Қонуни Ҷумҳурии Тоҷикистон “Дар бораи танзими анъана ва ҷашну маросим дар мамлакат” аз иқдому ташаббусҳое ба шумор меравад, ки давоми 18 сол дар самти танзими маъракаҳои гуногуни аҳолӣ ва беҳтар намудани шароити модиву майишии мардум нақши асосӣ бозид.
Ба хизматчиёни ҳарбӣ бори дигар ёдоварӣ карда шуд, ки то ҳанӯз ҳам баъзе аз ҳамватанони мо ҳангоми оростани дастархони иду ҷашнҳо ба исрофкорӣ роҳ медиҳанд, ки ин амали онҳо хилофи қонунгузорӣ ва русуми диниву дунявӣ аст. Аз ин лиҳоз, сарфакорӣ ҳангоми баргузории дилхоҳ маъракаҳо ҳам ба манфиати давлат ва ҳам оилаи онҳо мебошад.
Баланд бардоштани тарбияи ҳарбӣ-ватандӯстии хизматчиёни низомӣ ва ҷавонон аз мавзуъҳои дигар ва муҳими суҳбат буд. Дар ин қисмат ибрози назар шуд, ки қабули Қонуни Ҷумҳурии Тоҷикистон «Дар бораи тарбияи ватандӯстии шаҳрвандон» дар шароити зуҳури омилҳои хатарноки замони муосир, аз ҷумла терроризму экстремизм, дигар ҷиноятҳои фаромиллӣ, таассуби динӣ ва бегонапарастӣ, ки башариятро ба ташвиш овардаанд, тақозои замон буда, масъулияти мақомоти давлатию ҷамъиятӣ ва шаҳрвандонро дар рушду инкишофи мамлакат, ҳифзи манфиатҳои милливу давлатӣ баланд мебардорад.
Имрӯзҳо, ки бо шарофати Истиқлолияти давлатӣ ва саҳми хизматчиёни ҳарбӣ дар кишвари азизамон Тоҷикистони биҳиштосо сулҳу суботи комил пойдор аст, саҳми ҳар як сарбозу афари Вазорати мудофиаи Ҷумҳурии Тоҷикистон дар пойдор нигоҳ доштани ин неъмати бебаҳои миллат муҳим арзёбӣ шуд.
Илҳом АЛИЗОДА,
сардори Маркази матбуот ва иттилооти
Вазорати мудофиаи Ҷумҳурии Тоҷикистон,
капитан
