Яке аз падидаҳои номатлубе, ки имрӯз ҷомеаи ҷаҳонро нигарон намудааст, зуҳуроти терроризм ва экстремизм аст. Бо мақсади пешгирии ҷавонон аз гаравидан ба ҳар гуна ҳизбу ҳаракатҳои иртиҷоӣ ва даст назадан ба ҷинояту ҷиноякорӣ, чанде қабл дар Донишкадаи ҳарбии Вазорати мудофаи Ҷумҳурии Тоҷикистон вохӯрии курсантон бо намояндагони Кумитаи давлатии амнияти миллӣ сурат гирифт. Дар вохӯрӣ доир ба нақш, аҳамият ва татбиқи амалии Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025, мубодилаи афкор сурат гирифта, аз ҷумла изҳор гардид, ки имрӯз таҳдиди терроризму ифротгароӣ ба сулҳу суботи кишварҳо, таъмини ҳаёти осоиштаи мардумон, амнияту оромии як қатор давлатҳо ва пешрафти самту соҳаҳои гуногуни ҷомеаи муосир, хатарҳои ҷиддиро эҷод намудааст.
Иштирокчиёни вохӯрӣ зимни баромади худ таъкид карданд, ки дар шароити паёмадҳои сиёсию идеологӣ ва таҳдиду хатарҳо ба амнияту суботи кишварҳо, аҳли зиё ва дигар қишри фаъоли ҷомеи моро зарур аст, ки ба хотири тарбияи дурусти насли наврасу ҷавонон аз тамоми роҳу воситаҳои таъсиррасон кор баранд. Зеро, ҷавонон қувваи бузурганд ва бузургтарин масъулият, яъне ҳифзу ҳимояи Ватан бар зиммаи онҳо вогузор шудааст.
Мусаллам аст, ки имрӯз хатарҳои терроризму экстремизм ҳар лаҳза шакл гирифта, барои мардуми сайёра таҳдиду хатарҳоро эҷод мекунад. Барои мувоҷеҳ нагардидан бо ин вабои аср, маҳз иттиҳоду сарҷамъии кишварҳои минтақа ва ҷаҳон зарур аст.
Дар маҷмӯъ метавон гуфт, ки маҳз самараи ташкили чунин чорабиниҳо ва гузаронидани ин қабил корҳои фаҳмондадиҳӣ боис гаштааст, ки имрӯз дар ҷузъу томи Артиши миллӣ сифати таълиму тарбия ва маърифати ҳуқуқии ҳайати шахсӣ беҳтар гардидааст.
Шоҳин ШАРИФОВ
