6 феврал дар толори асосии Вазорати мудофиаи Ҷумҳурии Тоҷикистон вохӯрии вазири мудофиаи мамлакат генерал-полковник Эмомалӣ Собирзода бо шунавандагони маҳфили омӯзишии «Ҷавонон — пайравони Пешвои миллат» баргузор гардид.
Дар чорабинӣ инчунин роҳбарияти Кумитаи кор бо ҷавонон ва варзиш, намояндагони Мақомоти иҷроияи ҳокимияти давлатии шаҳри Душанбе, аз ҷумла Раёсати кор бо ҷавонон ва варзиши пойтахт ва сардорони баъзе раёсату шуъбаҳои дастгоҳи марказии Вазорати мудофиа иштирок доштанд.
Вазири мудофиаи мамлакат генерал-полковник Эмомалӣ Собирзода дар баромади худ аз вазъи кунунии ҷаҳони муосир, корнамоиву ташаббусҳои беназири Пешвои миллат дар арсаи байналмилалӣ ва тарбияи ватандӯстиву ватанпарастии ҷавонон ёдоварӣ намуда, кору фаъолияти афсарону сарбозони Қувваҳои Мусаллаҳи мамлакатро дар роҳи ҳимояи Ватан ва ҳифзи марзу буми ин сарзамин муҳим арзёбӣ намуд. Қайд гардид, ки имрӯз Артиши миллӣ ҳамчун сипари боэътимоди давлату Ҳукумат дар таҳкими иқтидори мудофиавии кишвар нақши муассир дошта, сазовори бовариву таваҷҷуҳи доимии Пешвои муаззами миллатанд.
Пас аз суханронии вазири мудофиа бахши муколама ва мубодилаи афкор сурат гирифта, ҷавонон ба саволҳои худ аз ҷониби вазир посухҳои мушаххас пайдо намуданд.
Дар қисмати ҷамъбастии чорабинӣ маросими тақдими туҳфаҳо сурат гирифт.
Илҳом АЛИЗОДА,
сардори Раёсати иттилоот ва робита бо ҷомеаи
Вазорати мудофиаи Ҷумҳурии Тоҷикистон,
капитан
