4-уми феврали соли равон дар Донишгоҳи техникии Тоҷикистон ба номи академик М. С. Осимӣ вохӯрии вазири мудофиаи Ҷумҳурии Тоҷикистон генерал-полковник Собирзода Эмомалӣ бо хатмкунандагони ин муассисаи олӣ баргузор гардид. Ин мулоқот дар доираи сиёсати давлатии дастгирии ҷавонон ва таҳкими рӯҳияи ватандӯстӣ доир шуда, дар он ректори донишгоҳ Давлатзода Қудрат низ иштирок намуд.
Қабл аз оғози вохӯрӣ дар як гӯшаи донишгоҳ маҳсулоти истеҳсолнамуда, корҳои илмӣ-тадқиқотӣ, намунаҳои техникӣ ва ихтироъҳои донишҷӯён ба маърази тамошо гузошта шуданд. Ин намоиш бозгӯи сатҳи баланди дониш, маҳорат ва ҷаҳонбинии ҷавонони тоҷик буд. Вазири мудофиа аз намоиш дидан намуда, бо муаллифони корҳо суҳбат кард ва фаъолияти онҳоро ҳамчун саҳм дар рушду пешрафи кишвар муҳим арзёбӣ намуд.
Баъдан, дар толори асосии донишгоҳ ва дар фазои орому самимӣ суҳбати рӯ ба рӯйи вазири мудофиа бо донишҷӯён баргузор гардид. Зимни суханронӣ вазири мудофиа генерал-полковник Собирзода Эмомалӣ доир ба аҳамияти таҳсил, масъулияти шаҳрвандӣ ва нақши ҷавонон дар таъмини амнияту суботи кишвар ибрози назар намуд. Таъкид гардид, ки имрӯз ҷавонони донишманду ватандӯст омили асосии пешрафти давлат ба шумор мераванд.
Мавзӯи меҳварии мулоқот ба тарҳи нави қонун дар соҳаи хизмати ҳарбӣ бахшида шуд. Тибқи ин тарҳ, минбаъд хатмкунандагони муассисаҳои таҳсилоти олии кишвар метавонанд, бо гузаштан аз курси махсуси семоҳа ҳамчун афсар дар сафи Қувваҳои Мусаллаҳи Ҷумҳурии Тоҷикистон фаъолият намоянд. Ин ташаббус ҳамчун имконияти мусоид барои ҷалби мутахассисони ҷавон ҷиҳати фаъолият дар сохторҳои низомӣ ва истифодаи донишҳои касбии онҳо арзёбӣ гардид.
Дар идомаи вохӯрӣ миёни вазири мудофиа ва донишҷӯён саволу ҷавоби фаъол сурат гирифт. Донишҷӯён суолҳои худро вобаста ба тартиби хизмат, шароити фаъолияти афсарон ва дурнамои касбӣ матраҳ намуда, посухҳои қонеъкунанда дарёфт карданд.
Вохӯрӣ дар руҳияи ҳамдигарфаҳмӣ ва самимият анҷом ёфта, барои хатмкунандагон ҳамчун як рӯйдоди муҳим ва фараҳбахш буд.
Шоҳин ШАРИФЗОДА,
лейтенанти хурд
