Дар асоси мулоқоти Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе, Президенти Федератсияи футболи Тоҷикистон муҳтарам Рустами Эмомалӣ бо масъулони соҳаи футболи кишвар, ки рӯзи 3-юми феврали соли 2025 баргузор гардида буд, имрӯз вохӯрии вазири мудофиаи Ҷумҳурии Тоҷикистон генерал–лейтенант Эмомалӣ Собирзода бо ноиби Президенти Федератсияи футболи Тоҷикистон доир шуд.
Зимни вохурӣ нахуст ҳамкориҳои ду ҷониб дар сатҳи зарурӣ арзёбӣ шуда, масъалаи азнавсозии Варзишгоҳи “Клуби Марказии варзиши артиш” – и Вазорати мудофиа мавриди баррасӣ қарор гирифт.
Тибқи лоиҳа варзишгоҳ дорои 5 ҳазор ҷойи нишаст буда, азнавсозии он соли 2023 оғоз гардида буд ва ин варзишгоҳ марҳила ба марҳила ба талаботи замони муосир мутобиқ гардонида мешавад.
Ҳангоми таҳияи лоиҳа ҳама меъёрҳои сохтмонӣ ва ҷузъиёти муҳими варзишӣ ба инобат гирифта шуда, корҳои насби нишастгоҳҳо дар қисмати шарқӣ, монитори калон, чароѓҳои равшанидиҳанда, таъмири ҷории утоқҳои либосивазкунӣ, мураббиён ва системаи обпошии муосир ба анҷом расонида шудааст.
Бо назардошти талаботи сохтмони варзишгоҳҳои муосири ҷаҳонӣ, дар варзишгоҳ ҳуҷраҳои алоҳидаи мураббияҳо, кормандон, дастаҳои футбол, ҷойи либосивазкунӣ, ҳаммом ва дигар шароити маишӣ дар сатҳи зарурӣ ба иҷро расонида мешаванд.
Майдони бозии футбол ба масоҳати беш аз 6 ҳазор метри мураббаъ бо сабзаи табиӣ таъмин карда шудааст, ки ин барои баргузории мусобиқаҳои гуногуни варзишӣ дар сатҳи касбӣ мусоидат менамояд.
Азнавсозии варзишгоҳи “Клуби Марказии варзиши артиш”–и Вазорати мудофиа дар доираи иқдомҳои созандаву бунёдкоронаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба истиқболи ҷашни бузурги миллӣ–35 солагии Истиқлолияти давлатӣ ба нақша гирифта шудааст.
Бо назардошти имкониятҳои мавҷуда ва баҳри оммавӣ гардонидани футбол дар байни кормандони вазорат тасмим гирифта шуд, ки бо ҷалби хоҳишмандон дастаҳои занонаи футбол ва мардонаи футзал таъсис дода мешавад.
Ҷиҳати ҷалби ҳарчи бештари кормандони ин ниҳоди қудратӣ ба варзиш, сохтмони варзишгоҳи дуюм бо сабзаи сунъӣ ба инобат гирифта шудааст, ки корҳои сохтмонии он дар сатҳи зарурӣ идома дорад.
Ҳоло бо ҷалби мутахассисон корҳои шаѓалпуркунӣ ва бетонрезӣ ба охир расида, рўзҳои наздик насби сабзаи сунъӣ оғоз мешавад.
Иншооти мазкур баъди навсозии пурра барои баргузории бозиҳои хонагӣ байни дастаҳои Лигаи олии футболи Тоҷикистон ва мусобиқаҳои шаҳриву ҷумҳуриявӣ бисёр мувофиқ мебошад.
Лозим ба таъкид аст, ки азнавсозии иншооти мазкур дар идомаи бозиҳои футбол ва рушди ин навъи варзиш дар байни кормандони Вазорати мудофиа заминаи воқеӣ фароҳам менамояд.
Маркази матбуот ва иттилооти
Вазорати мудофиаи Ҷумҳурии Тоҷикистон
