28 январ вохурии вазири мудофиаи Ҷумҳурии Тоҷикистон генерал – полковник Эмомалӣ Собирзода бо донишҷӯёни Донишгоҳи технологии Тоҷикистон баргузор шуд.
Қабл аз оғози суҳбат дар ин вохӯрӣ, нахуст ректори Донишгоҳи технологии Тоҷикистон Раҳмонзода Зоир Файзалӣ, вазири мудофиаи кишварро бо дастовардҳо ва имкониятҳои ин боргоҳи илму маърифат шинос намуд.
Зимни суҳбат таъкид шуд, ки имрӯз ҷомеаи ҷаҳонӣ бо суръат рушд мекунад ва рӯз то рӯз дар самту соҳаҳои гуногун технологияҳои наву замонавӣ ихтироъ мегарданд, ки аз худ намудан ва истифодаи дурусти онҳо аз ҳар як ҷавон, махсусан донишҷӯён масъулият ва дониши баландро талаб менамоянд.
Гуфта шуд, ки Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар Паёми навбатияшон ба Маҷлиси Олӣ навсозии низоми идоракунии давлатӣ дар заминаи технологияҳои муосири инноватсионӣ ва истифодаи мақсадноки зеҳни сунъиро яке аз самтҳои меҳварии сиёсати давлатӣ маънидод намуданд ва ин моро водор месозад, ки дар самти мазкур тадбирҳои муҳим андешем.
Дар ҳамин замина ҷалби донишҷӯёни боистеъдоду донишманд ба самтҳои гуногуни хизмати ҳарбӣ ва афсарӣ муҳим дониста мешавад, қайд намуд вазири мудофиаи кишвар генерал – полковник Эмомалӣ Собирзода.
Ба донишҷӯён пешниҳод гардид, ки бо дастгирии Ҳукумати Ҷумҳурии Тоҷикистон ва Вазорати мудофиаи кишвар акнун онҳо метавонанд баъди хатми донишгоҳи мазкур ба сафи Артиши миллӣ шомил гардида, пас аз адои муҳлати кутоҳи хизмати ҳарбӣ, ҳамчун афсар дар самтҳои гуногун ба кор таъмин карда шаванд.
Ректори Донишгоҳи технологии Тоҷикистон Раҳмонзода Зоир Файзалӣ ба роҳбарияти Вазорати мудофиа ҷиҳати ташкили чунин як вохӯрии судманд бо омӯзгорону донишҷӯён изҳори сипос намуда, дар идома аз донишҷӯён даъват ба амал овард, ки ба қадри тинҷиву оромии ин сарзамин бирасанд ва баъди хатми донишгоҳ ҳамчун мутахассисони варзидаи соҳа ба халқу Ватани хеш содиқона хизмат намоянд.
Дар қисмати дигари вохурии озоду самимӣ вазири мудофиаи кишвар ба саволҳои донишҷӯён посухи мушаххас дод.
Илҳом АЛИЗОДА,
сардори Раёсати иттилоот ва робита бо ҷомеаи
Вазорати мудофиаи Ҷумҳурии Тоҷикистон,
капитан
