Имрӯзҳо дар барорбари хизматчиёни ҳарбӣ, толибилмони синфҳои болоӣ, донишҷӯён ва ҳар як фарди худогоҳу меҳандӯст низ хизмат дар сафи Қуввахои Мусаллах ва дифо аз марзи муқаддаси ватанро аз муҳитарин вазифаи шаҳрвандии худ дониста, бо эҳсоси баланди ватандӯстӣ ва садоқат ба халқу ватан аз қисму воҳидҳои низомӣ дидан менамоянд.
Зимни чунин як чорабинӣ хонандагони муассисаҳои таҳсилоти миёнаи умумии шаҳри Душанбе ва донишҷӯёни Коллеҷи техникӣ — технологии назди Ташкилоти ҷамъиятии мададгори мудофиа аз Маркази таълимии Қӯшунҳои хушкигарди Қуввахои Мусаллахи Ҷумхурии Точикистон дидан намуда, бо муҳит ва шароити хизмат, аз ҷумла ошхона, хобгоҳи сарбозон, хонаҳои фароғативу хизмати маишӣ, маҷлисгоҳ, нуқтаи тиббӣ, хонаи дидорбинии волидайн, истгоҳҳои техникиву автомобилӣ, майдони сафороию варзишӣ ва силоҳу лавозимоти ҳарбӣ аз наздик ошно гардиданд.
Ҷавонони ба қавли худашон аллакай ба хизмат омода буда зимни дидан намудан аз шароити хоси буду боши афсарону сарбозон дар ин қисми ҳарбӣ, бо эътимоди афзун нисбат ба Артиши миллӣ ва дилбастагӣ ба адои вазифаи шаҳрвандӣ дар назди Ватан, таъкид карданд, ки ҳар гушаи диёри маҳбубамон пораи қалби бузурги мо аст, ки бар дифои ҳар зарра хокаш ва ҳифзи шарафу номуси ҳамватанон ҳамеша омодаем.
Бо чунин рӯҳияи матин ва садоқату сарсупурдагӣ ҷавонони содиқи диёр омодаи даъват ва хизмат ба халқу ватананд. Ин аст, ки дидан намудан аз қсмҳои ҳарбӣ ва ошно гардидан бо силоҳу муҳимоти ҷангиву тарзи истифодабарии онро ин гурӯҳи ҷавонон аз муҳимтарин сабақ дар дарси мардонагӣ маънидод карданд.
Ҳамзамон, дар нуқтаҳои таълимӣ машғулиятҳо бо намоши силоҳу муҳимоти сабуки ҷангӣ роҳандозӣ гардида буд, ки афсарони ҷавони роҳбари машғулият аз таъинот ва тарзи истифодаи ин қабил силоҳҳои оташфишон ҷавонаскарони ояндаи ватанро ошно гардониданд.
Албатта, моҳияти барҷастаи ин қабил тадбирҳо дар он аст, ки муҳофизони ояндаи Ватан бевосита аз имкониятҳои фароҳамсохтаи давлату Ҳукумат таҳти сиёсати муваффақонаи Пешвои миллат, Президенти ҶТ муҳтарам Эмомалӣ Раҳмон дар сохторҳои ҳарбӣ ва ҷузъу томи низомӣ бевосита шиносоӣ пайдо намуда, дар ин замина аз муҳимияти хизмати ҳарбӣ дар сафи ҚМ маълумоту таассуроти аниқ ҳосил намоянд.
Боқи Шарифзода
хабарнигор
