Дар доираи ҳадафҳои солимгардонӣ ва тибқи нақша-чорабиниҳои варзишии Клуби марказии варзишии артиши Вазорати мудофиа, пайваста дар қисму воҳидҳои ҳарбии ҳудуди гарнизонҳои ҷумҳурӣ бо иштироки хизматчиёни ҳарбии сатҳу зинаҳои гуногун мусобиқаҳои варзишӣ ташкилу ба роҳ монда мешавад.
Дар он дастаҳои варзишгари ҳар як қисми ҳарбӣ бо омодагии ҷиддӣ ва рӯҳияи болида ширкат меварзанд. Мусобиқаҳои мазкур дар сатҳи зарурӣ ташкил карда шуда, он бештари вақтҳоти аз рӯйи навъи гуногуни варзиш, ҷараён гирифта, ҷиҳати сабқати озодонаи иштирокчиён майдонҳои махсус омода карда мешаванд.
Ҳар як сарбози дар ин гуна мусобиқаҳо иштирокдошта кӯшиш менамояд, ки маҳорати хуби варзишӣ ва бартарияти худро нишон дода, ҷойи намоёнро ишғол созад ва шарафи ҳамсафону нуфузи қисми ҳарбии худро ҳифз намояд. Онҳо дар баробари ширкату қувваозмоӣ дар ин гуна мусобиқаҳо бо ҳамсафони худ табодули таҷриба намуда, маҳорату таҷрибаи худро такмил медиҳанд.
Мақсад аз ташкилу роҳандози намудани мусобиқаҳои варзшӣ ин пеш аз ҳама ҳифзи сиҳатӣ ва обутоби ҷисмонии сарбозон баҳри сарбаландона ва бечунучаро ба ҷо овардани вазифаҳои хизматӣ буда, гузашта аз ин бо ин васила омодагии доимии онҳоро ба хатару таҳдидҳои эҳтимолӣ нишон медиҳад.
Бояд гуфт, ки солҳои охир аз тарафи масъулини Вазорати мудофиа ба варзиш диққати хосса зоҳир шуда, майлу рағбати сарбозон низ ҷиҳати камолоти ҷисмонии худ ва иштирок дар мусобиқаҳои варзишӣ бештар гаштааст, ки инро метавон аз сатҳи баргузории чунин чорабиниҳои варзишӣ мушоҳида намуд.
Зимни ҷамъбасти ҳар як мусобиқаи варзишӣ, иштирокчиёни фаъоли он бо медалу ифтихорномаҳо ва дигар туҳфаҳои хотиравӣ қадрдонӣ карда мешаванд.
Б. ШАРИФОВ
