Дар яке аз Марказҳои таълимии Қўшунҳои хушкигарди Қувваҳои Мусаллаҳи Ҷумҳурии Тоҷикистон чорабинии бошукўҳи идона ё худ маросими савгандёдкунии наздик ба 200 нафар наваскарон доир гардид, ки бо ворид гардидани Байрақи ҷангӣ ба майдон ва садо додани Суруди миллӣ оғоз ёфт.
Дар ин чорабинӣ масъулини Раёсати Қўшунҳои хушкигард, падару модарон, наздикону пайвандони наваскарон иштирок доштанд. Дар қисмати асосии чорабинӣ наваскарон дар назди ҳайати меҳмонон ва афсарону сарбозони қисми ҳарбӣ баҳри садоқат ба ин сарзамин ва анҷоми бомуваффақонаи рисолати шаҳрвандии худ Савганди ҳарбӣ ёд намуданд.
Қабул намудани Савганди ҳарбӣ ин худ як садоқати мардона аст ва ҷавононро ўҳдадор менамояд, ки баҳри муҳофизати марзи муқаддаси сарзамини аҷдодӣ ва ҳифзи дастовардҳои замони истиқлол доимо омода бошанд. Қобили қайд аст, ки ин наваскарон бо як ғурури ҷавонмардӣ аз муҳофизати марзу буми аҷдодӣ ва содиқ будан ба ватан ифтихор доштанд, ки чунин ифтихору самимият ва дўст доштани ин Ватан аз ниҳоди ҳар як иштирокчии ин ҷамъомад эҳсос карда мешуд.
Дар идома аз ҷониби як гурўҳ сарбозони ин воҳиди низомӣ дар назди иштирокдорони чорабинӣ задухўрдҳои тан ба тан бо усулҳои шарқӣ намоиш дода шуд, ки онро ҳозирин бо рўҳияи болида ва эҳсоси баланди ватандўстона қабул намуданд.
Бояд гуфт, ки аз рўзҳои аввали шомил шудани ҷавонон ба сафи Қувваҳои Мусаллаҳи кишвар онҳо ба машғулиятҳои курси ибтидоии наваскарӣ ҷалб мегарданд, ки аз ҷониби афсарони соҳибтаҷриба ба эшон тартиби рўз дар қисми ҳарбӣ, тарзи сафороиву қадамзанӣ, истифодаи силоҳу муҳиммоти ҷанӣ ва дигар мавзўъҳои амсоли ин ҳамаҷониба омўзонда мешавад.
Ҳамин тавр, ҷамъомади бошукўҳи он рўз доир гардида дар қисми ҳарбии мазкур бо гузашти низомии ҳайати шахсӣ аз назди минбар ва ҳайати роҳбарону меҳмонон ба поён расид.
Боқӣ ШАРИФОВ
майор
