Ҷаласае, ки дар толори асосии Вазорати мудофиаи мамлакат ва бо иштироки ҳайатҳои роҳбарии ин ниҳоди қудратӣ, фармондеҳони навъҳои Қувваҳои Мусаллаҳ, комиссарони ҳарбии вилоятҳо ва командирони қисму воҳидҳои алоҳидаи низомӣ баргузор гардид, дар он бурду бохт ва фаъолияти соҳавии ин вазорат дар нуҳ моҳи соли равон мавриди таҳлилу баррасӣ қарор дода шуд.
Дар робита ба масъалаҳои баррасишаванда, сардори Ситоди генералии Қувваҳои Мусаллаҳ, муовинони вазири мудофиа ва чанде аз масъулини ин ниҳоди қудратӣ дар назди ҳозирин бо маърӯза баромад намуда, вобаста ба як қатор масъалаҳои муҳими соҳавӣ, аз ҷумла тайёрии амалиётӣ, барномаҳои таълимии самти омодабошии ҷангӣ, ҷараёни чорабиниҳои даъватии шаҳрвандон ба хизмати ҳарбӣ, қабулу ҷобаҷокунии наваскарон дар қисмҳои низомӣ, чорабиниҳои омодагии сафарбарӣ, фаъолияти хадамоти қӯшунҳо, вазъи қонунияту тартиботи ҳуқуқӣ, омодагии масъулин ба фасли сармо, андешидани тадбирҳои зарурӣ дар самти таъминоти ҳамаҷонибаи воситаҳои моддӣ-техникӣ, ҷамъовариву захира намудани маҳсулоти кишоварзӣ, рушди хоҷагиҳои ёрирасон, тақвият бахшидани самти ақибгоҳӣ ва дар ин замина баъзе аз норасоиву камбудиҳои ошкоршуда низ, дар самтҳои фаъолияти ин ниҳоди қудратӣ мавриди муҳокима ва таҳлилу натиҷагирӣ қарор гирифтанд.
Баъд аз баррасии масъалаҳои зикрёфта, вазири мудофиаи мамлакат генерал-полковник Шералӣ Мирзо аз вазъияти ниҳоят ҳассос ва пешгӯйинашаванда дар баъзе аз давлатҳои минтақа ва ҷаҳон изҳори нигаронӣ карда, қайд намуд, ки дар чунин шароит мо хизматчиёни ҳарбии Артиши миллиро зарур аст, ки баҳри ҳимояи марзу буми Тоҷикистони азиз ва баланд бардоштани иқтидори мудофиавии кишвар ҳарчӣ бештар ҷаҳду талош намоем ва бо хизмати содиқонаву софдилона тамоми самтҳои фаъолияти соҳавиро боз ҳам тақвият бахшем.
Дар ин радиф, ҳайатҳои роҳбариву фармондеҳӣ ва хизматчиёни ҳарбии ҳама зинаҳо ва мартабаҳо вазифадор гардиданд, ки дар навбати аввал нисбат ба тамоми дастуру супоришҳо ва вазифаҳое, ки аз ҷониби Сарфармондеҳи Олии Қувваҳои Мусаллаҳ, генерали артиш муҳтарам Эмомалӣ Раҳмон бар дӯши мо низомиён вогузор гардидааст, тадбирҳои бетаъхир андешида, онро таҳти назорати доимӣ ва роҳнамои фаъолияти рӯзмарраи хеш қарор диҳанд.
Дар охири ҷаласа роҳбарияти Вазорати мудофиа пеш аз ҳама баҳри ислоҳу бартараф намудани камбудиҳои ҷойдошта, ташкили хизмати қӯшунҳо, боз ҳам тақвият бахшидани сатҳи тайёрии ҷангӣ, таъмини волоияти қонун, пешгирӣ аз сатҳи содиршавии ҷинояту қонуншиканӣ, таҳким бахшидани корҳои сиёсӣ-тарбиявӣ, таваҷҷӯҳи ҷиддӣ зоҳир намудан ба сатҳу сифати даъвати шаҳрвандон ба хизмати ҳарбӣ, аз сафи Қувваҳои Мусаллаҳ дар фазои тантанавӣ ва бо изҳори сипосу миннатдорӣ гусел намудани сарбозони муҳлати хизматро адонамуда, қабулу ҷобаҷокунии наваскарон дар қисмҳои низомӣ, таъмини сарбозони ҷавон бо шароитҳои беҳтарини хизматӣ, дар доираи ҳидоятҳои сарвари давлат ғамхориву дастгирӣ намудани ятимону бепарасторон дар ҷузъу томи Артиши миллӣ, бо омодагии ҳамаҷониба таҷлил намудани 30-солагии қабули Конститутсияи ҷумҳурӣ, таҳияву дар амал татбиқ намудани нақша-чорабиниҳои ҷашнӣ ба муносибати 35-умин солгарди Истиқлолияти давлатӣ ва умуман, вобаста ба ҷоннок намудани тамоми самтҳои фаъолияти соҳавӣ, иштирокчиён ва дигар масъулини ин ниҳоди қудратиро бо супоришҳои мушаххас вазифадор намуданд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
