Имрӯз ҳайати низомиёни Қувваҳои Мусаллаҳи Ҷумҳурии Тоҷикистон, ки дар доираи Созмони аҳдномаи амнияти дастаҷамъӣ (СААД) ва баҳри иҷрои рисолати сулҳҷӯёна, бо ризоияти Маҷлиси миллӣ ва Маҷлиси намояндагони Маҷлиси олии Ҷумҳурии Тоҷикистон ба Ҷумҳурии Қазоқистон сафарбар гардида буданд, ба Ватан баргаштанд.
Барои маълумот ёдовар мешавем, ки ҳайати нерӯҳои сулҳҷӯёнаи Созмони аҳдномаи амнияти дастаҷамъӣ СААД бо дархости роҳбарияти олии Ҷумҳурии Қазоқистон ва дар доираи қарори қабулнамудаи Шӯрои амнияти дастаҷамъии ин созмон сурат гирифта, ҷузъу томи сулҳҷӯёнаи Қувваҳои Мусаллаҳи Ҷумҳуриҳои Арманистон, Белорусия, Қирғизистон, Федератсияи Русия ва Ҷумҳурии Тоҷикистон, баҳри иҷрои рисолати пешбинигардида, шурӯъ аз санаи 6-уми январи соли 2022 ба ин кишвар сафарбар гардиданд.
Интиқоли низомиёни Қувваҳои Мусаллаҳи Ҷумҳурии Тоҷикистон, ки аз ҳисоби як ҷузъи
таъйиноти махсуси баталиони сулҳҷӯёнаи Қӯшунҳои зудамали Вазорати мудофиаи кишвар ба роҳ монда шуд, ҳайати муайяншуда, чун муҳофизони ҳақиқии Ватан ва посдори сулҳ, баъди интиқол ёфтан ба Ҷумҳурии Қазоқистон тавонистанд, ки баҳри ба эътидол овардану муътадил нигоҳ доштани вазъ дар ин давлати аъзои Созмони аҳдномаи амнияти дастаҷамъӣ СААД, ҳифзу ҳимояи бинову иншооти муҳуми давлатӣ, мавзеъҳои дорои таъйиноти иҷтимоӣ ва дар самти расонидани кӯмаки амалӣ ба сохторҳои қудратии ин кишвар, вазифаҳои ба онҳо вогузоршударо бо сарбаландӣ иҷро 
намоянд. Баъди иҷрои ин рисолати бузургу таърихӣ ва анҷом бахшидани уҳдадории байналмилалии Тоҷикистон дар ҳайати ин Созмони бонуфузи ҷомеаи ҷаҳонӣ, имрӯз тариқи ҳавопаймои ҳарбӣ-нақлиётии ИЛ-76 низомиёни сафарбаргардида ба Ватан баргаштанд.
Фаридун МАҲМАДАЛИЗОДА,
сардори Маркази матбуот
полковник
