24 апрел дар шаҳри Нораки вилояти Хатлон Президенти Ҷумҳурии Тоҷикистон Пешвои миллат муҳтарам Эмомалӣ Раҳмон корхонаи саноатии истеҳсоли обҳои нӯшокии “Глобал Инвест”-ро мавриди истифодабарӣ қарор доданд.
Корхонаи саноатии истеҳсоли маҳсулоти ватанӣ аз ҷониби соҳибкори ватандуст Хуҷамурод Азимӣ дар доираи таҷлили сазовор аз ҷашни бузурги миллӣ 35-солагии Истиқлолияти давлатӣ бунёд гардидааст.
Иншооти навбунёд дар минтақаи саноатии шаҳри Норак, ҷойгир буда, дар он намудҳои гуногуни оби нушокӣ истеҳсол карда мешавад. Ба Роҳбари давлат муҳтарам Эмомалӣ Раҳмон иттиллоъ доданд, ки дар корхона 30 кас аз сокинони маҳаллӣ бо кори доимӣ ва маоши хуб таъмин гардиданд.
Тавре зикр гардид, иқтидори истеҳсолии корхонаи мазкур дар як шабонарӯз 15 ҳазор капсула ва 5 ҳазор зарфи оби нӯшокиро ташкил медиҳад.
Ба иттилои масъулон, дар шаҳри Норак дар доираи татбиқи стратегияи саноатикунонии босуръати кишвар шумораи корхонаҳои саноатӣ ба 31 адад расонида шуда, маҷмуи маҳсулоти соҳа дар панҷ соли охир ба зиёда аз 2 миллиарду 427 миллион сомонӣ баробар гардидааст.
Дар корхонаҳои саноатии шаҳр 46 номгӯйи маҳсулоти ивазкунандаи воридот истеҳсол карда мешавад.
Президенти кишвар муҳтарам Эмомалӣ Раҳмон баъди ифтитоҳи корхонаи “Глобал Инвест” дар ҳамин ҷо аз намоишгоҳи маҳсулоти корхонаҳои саноатӣ дидан намуданд.
Дар намоишгоҳ 7 номгӯйи маҳсулоти ватанӣ, аз ҷумла намудҳои оби нӯшокӣ, равған, собун, капсула, гранула (донаҳои полиэтиленӣ), микросемент ва армасетка ба намоиш гузошта шуда буд, ки дар баробари таъмини бозори дохилии кишвар ба воридот низ нигаронида шудааст.
Дар ин корхона ҳамкории олимон бо истеҳсолот ба роҳ монда шудааст. Аз ҷумла, истеҳсоли микросемемент, ки маҳсулоти нодир ба шумор рафта, дар дохил ва хориҷи кишвар харидори зиёд дорад, натиҷаи ҳамкории корхона бо олими ихтирокори тоҷик Комрон Сафарзода мебошад. Ин намуди семент дар сохтмони неругоҳи Роғун низ васеъ истифода мешавад.
Роҳбари давлат муҳтарам Эмомалӣ Раҳмон дар баробари боздид аз намоиши маҳсулоти ватанӣ, ҳамчунин аз намоишгоҳи бахшида ба ҷашни Наврӯзи байналмилалии иборат аз гӯшаҳои маҳсули дасти ҳунармандон, таомҳои гуногуни тоҷикӣ, асбобҳои мусиқии миллӣ ва мисли инҳо, ки дар саҳни бинои корхонаи мазкур, ба намоиш гузошта шуда буданд, дидан намуданд.
Хуҷамурод Азимов дар баробари соҳибкори пешқадами кишвар буданаш, дар тарбияи дуруст, соҳиби маълумоти олӣ ва соҳибкасб кардани фарзандон шахси муваффақ аст. Ӯ фарзандонро ба илм аз худкардану касбомӯхтан ҳидоят кардааст. Натиҷа ҳамин аст, ки духтарон дар ҷамъият ҳар як соҳиби кори худ ҳастанд.
Президенти Ҷумҳурии Тоҷикистон муҳтарам Эмомалӣ Раҳмон зимни шиносоӣ ба соҳибкори ватанӣ Хуҷамурод Азимӣ барои иқдомҳои созандаву ибратбахш изҳори сипос намуданд.
president.tj
