Дар толори маҷлисии Комиссариати ҳарбии вилояти Суғд дар доираи баргузории машқҳои муштараки амалиётӣ-стратегӣ бо ҷалби қисму воҳидҳои низомии гарнизони Суғд, бо иштироки раисони шаҳру ноҳияҳо, комиссарони ҳарбӣ ва дигар масъулону намояндагони сохторҳои қудратӣ дар шаҳру ноҳияҳои ин вилоят ҷамъомади амалиётӣ-сафарбарӣ баргузор гардид.
Пеш аз оғози ҷамъомади мазкур, вазири мудофиаи Ҷумҳурии Тоҷикистон генерал-полковник Собирзода Эмомалӣ бо роҳбарияти сохторҳои марбута, раисони шаҳру ноҳияҳои ин вилоят суҳбат намуд.
Вазири мудофиа нахуст таваҷҷуҳи ҳозиронро ба иҷрои дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар самти мудофиаи давлат ва баланд бардоштани иқтидори мудофиавии кишвар ҷалб намуд.
Ҳамчунин таъкид рафт, ки маҳз дар якҷоягӣ бо амалӣ намудани иқдомҳои созанда дар самтҳои худ мо метавонем баҳри татбиқи ҳадафҳои стратегии Ҳукумати Ҷумҳурии Тоҷикистон, ки барои рушду пешрафти Ватани азизамон ва зиндагии аз ин ҳам босаодати мардум равона гардидаанд, саҳми арзишманд гузорем.
Иброз гардид, ки вазъи мураккабу зудтағйирёбандаи ҷаҳони имрӯза ва даргириҳо дар минтақаҳои алоҳида аз ҳар як шаҳрванди баору номус, махсусан масъулини мақомоти дахлдор ва роҳбарияти шаҳру ноҳияҳои ҷумҳурӣ, тақозо менамояд, ки баҳри ҳифзи оромиву суботи Тоҷикистони азизу соҳибистиқлол тамоми дониш ва таҷрибаи худро равона намоем.
Дар идома оид ба даъвати тирамоҳии шаҳрвандон ба сафи Қувваҳои Мусаллаҳи Ҷумҳурии Тоҷикистон, омӯзиши захираҳои сафарбарӣ, омодагиҳои ҷиддӣ ба Паради ҳарбӣ, ки ба муносибати таҷлили сазовори ҷашни 35-солагии Истиқлоли давлатӣ баргузор мешавад ва дигар масъалаҳои муҳим сухан рафт.
Ҳамин тавр, роҳбарияти мақомоти ҳифзи ҳуқуқ, тартиботи ҷамъиятӣ ва раисони шаҳру ноҳияҳои вилояти Суғд дар идомаи ҷамъомад ба машғулиятҳои таълимӣ ҷалб гардиданд. Дар ин қисмат намояндагони Вазорати мудофиа, Шурои амнияти Ҷумҳурии Тоҷикистон ва дигар сохторҳои дахлдор дар мавзӯъҳои гуногуни соҳавӣ маърӯза намуда, зимнан масъалаҳои муҳими вобаста ба амнияту суботи кишварро баррасӣ карданд.
Илҳом АЛИЗОДА,
сардори Раёсати иттилоот ва робита бо ҷомеаи
Вазорати мудофиаи Ҷумҳурии Тоҷикистон,
капитан
