Дар шаҳри Исфара бо иштироки Сардори Ситоди генералии Қувваҳои Мусаллаҳ–муовини якуми Вазири мудофиаи Ҷумҳурии Тоҷикистон, генерал-лейтенант Саидзода Бобоҷон ҷаласаи ситоди шаҳрӣ оид ба даъвати баҳоронаи ҷавонписарони солҳои таваллудашон 1999–2008 ба сафи Қувваҳои Мусаллаҳи Ҷумҳурии Тоҷикистон баргузор гардид.
Дар кори ҷаласа ҳайати шахсии комиссариати ҳарбӣ, роҳбарони ташкилоту муассисаҳо, мудирони шуъбаву бахшҳои мақомоти иҷроияи ҳокимияти давлатӣ, раисони ҷамоатҳои деҳот ва кумитаҳои маҳаллӣ иштирок намуданд.
Ҷаласа бо баррасии масъалаҳои марбут ба ҷараёни омодагӣ ва ташкили маъракаи даъвати баҳорона оғоз гардида, масъулин доир ба корҳои анҷомдодашуда ва нақшаҳои минбаъда ҳисобот пешниҳод намуданд. Зикр гардид, ки даъвати ҷавонписарон ба сафи Артиши миллӣ яке аз вазифаҳои муҳими давлатӣ буда, иҷрои саривақтӣ ва босифати он аз ҳамоҳангии фаъолияти тамоми сохторҳои марбута вобастагии мустақим дорад.
Сардори Ситоди генералии Қувваҳои Мусаллаҳ генерал-лейтенант Саидзода Бобоҷон зимни суханронии худ вазъ ва натиҷаҳои давраи омӯзишии фаъолияти комиссияи даъвати баҳоронаи шаҳрро мавриди таҳлили амиқ қарор дода, ҷиҳати бартараф намудани камбудиҳои ҷойдошта ва баланд бардоштани сатҳи масъулиятнокии шахсони дахлдор дастуру супоришҳои мушаххас дод. Таъкид гардид, ки ҷалби ҷавонон ба хизмати ҳарбӣ бояд дар заминаи риояи қатъии қонунгузорӣ, шаффофият ва масъулияти баланд роҳандозӣ гардад.
Ҳамзамон, ба масъалаҳои баланд бардоштани сатҳи маърифати ҳуқуқии ҷавонон, таҳкими корҳои фаҳмондадиҳӣ миёни аҳолӣ, ҳамкории зич бо муассисаҳои таълимӣ ва волидайн таваҷҷуҳи махсус зоҳир карда шуд.
Қайд гардид, ки хизмат дар сафи Қувваҳои Мусаллаҳ мактаби ҷасорату мардонагӣ ва садоқат ба Ватан буда, ҳар як ҷавонписар бояд бо ҳисси баланди ватандӯстӣ ва масъулият дар иҷрои ин рисолати муқаддас саҳмгузор бошад.
Дар фарҷоми ҷаласа барои боз ҳам тақвият бахшидани корҳои ташкилию фаҳмондадиҳӣ ва таъмини иҷрои саривақтии нақшаи даъвати баҳорона ба шахсони масъул супоришҳои мушаххас дода шуда, таъкид гардид, ки назорати раванди иҷрои онҳо таҳти таваҷҷуҳи доимӣ қарор хоҳад гирифт.
