Рӯзҳои 4 – 9-уми август дар Машқгоҳи таълимии «Фахробод»-и Вазорати мудофиаи мамлакат воқеъ дар гарнизони Хатлон бо иштироки наздики 100 нафар хизматчиёни ҳарбӣ, машқҳои зиддитеррористии дуҷонибаи ҷузъу томи таъйиноти махсуси Қувваҳои Мусаллаҳи Ҷумҳурии Тоҷикистон ва Ҷумҳурии Исломии Покистон таҳти унвони “Дӯстӣ-2025” баргузор гардид.
Машқҳои низомӣ бо садо додани сурудҳои миллӣ ва бардоштани парчамҳои давлатии ҳарду кишвари ба ҳам дӯсту бародар расман оғоз шуд.
Дар ин машқҳо гурӯҳҳои таъйиноти махсус, ҷузъу томи ҳамлаовари десантӣ, пиёданизом ҷалб гардида, роҳу усулҳои истифодаи силоҳу муҳиммоти ҳозиразамони ҳарбӣ ва дигар лавозимоти ҷангиро дар самти мубориза алайҳи терроризм намоиш доданд.
Лозим ба таъкиди хос аст, ки бо дастгирии Ҳукумати Ҷумҳурии Тоҷикистон ва саҳми Вазорати мудофиаи кишвар дар Машқгоҳи таълимии «Фахробод»-и Қӯшунҳои зудамали Қувваҳои Мусаллаҳ баҳри дар сатҳи баланд ташкилу баргузор намудани ҳама гуна машқҳои низомии сатҳи минтақавию байналмилалӣ шароити мусоид фароҳам оварда шудааст.
Машқҳои муштараки “Дӯстӣ-2025” баҳри сайқал додани маҳорати саҳроии ҷузъу томи таъйиноти махсус ҳангоми гузаронидани чорабиниҳо дар шароити кӯҳсор ва иншоот, такмил додани тобоварии ҷисмонӣ ва устувории руҳию ахлоқии ҳайати шахсӣ, ташкили ҳамоҳангсозӣ ва мубодилаи таҷриба байни ҷузъу томи таъйиноти махсуси Ҷумҳурии Тоҷикистон ва Ҷумҳурии Исломии Покистон заминаи воқеӣ фароҳам овард.
Зимни ҷамъбасти машқҳои зиддитеррористӣ иброз шуд, ки мустаҳкам гардидани робитаи дӯстӣ миёни кишварҳо, муборизаи дастҷамъона алайҳи терроризму экстремизм ва таъмини сулҳу субот дар ҳама кишварҳои олам дар сиёсати хориҷии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон мавқеи устувор дорад.
Дар шароити имрӯза, ки афзоиши хатарҳои терроризму экстремизми байналмилалӣ, муомилоти ғайриқонунии маводи мухаддир ва дигар амалҳои номатлуби ҷомеа шиддат мегирад, баргузории машқҳои муштараки зиддитеррористии “Дӯстӣ-2025” миёни ҳарду кишвари ба ҳам дӯсту бародар муҳим ва саривақтӣ арзёбӣ гардид.
Зимни натиҷагирӣ аз даври ниҳоии машқҳои васеи низомӣ инчунин ба як қатор иштирокчиёни фаъоли тамринҳои муштарак, медалу ифтихорнома ва дигар туҳфаҳои гуногуни хотиравӣ тақдим шуд.
Илҳом АЛИЗОДА,
сардори Маркази матбуот ва иттилооти
Вазорати мудофиаи Ҷумҳурии Тоҷикистон,
капитан
