26 май дар пайравӣ ба иқдоми шоистаи Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон ҷиҳати ба Ватан овардани мушти хоки Қаҳрамонони Тоҷикистон, дар Оромгоҳи Лучоб маросими гулгузории ҳайати шахсии дастгоҳи марказии Вазорати мудофиа ва раёсати Қӯшунҳои зудамал баргузор гардид.
Дар ин чорабинӣ, дар баробари хизматчиёни ҳарбӣ, собиқадорони Қувваҳои Мусаллаҳ низ фаъолона иштирок намуданд.
Иштирокчиён бо гузоштани гулчанбарҳо ба хоки қаҳрамонони Тоҷикистон – Нусратулло Махсум, Шириншо Шотемур ва арбоби давлатӣ, чеҳраи барҷастаи фарҳангии таърихи миллат Нисор Муҳаммад эҳтироми амиқи худро баён намуда, хотираи неки онҳоро гиромӣ доштанд.
Зимни маросим таъкид гардид, ки ин иқдом идомаи мантиқии сиёсати фарҳангпарварона ва башардӯстонаи Сарвари давлат ба ҳисоб рафта, ба таҳкими худшиносии миллӣ ва тарбияи насли ҷавон дар руҳияи ватандӯстӣ мусоидат менамояд. Қайд карда шуд, ки хизматҳои арзандаи ин чеҳраҳои барҷаста дар ташаккули давлатдории миллӣ ва ҳифзи арзишу манфиатҳои халқи шарафманди Тоҷикистон барои ҳар як шаҳрванди кишвар, бахусус хизматчиёни ҳарбӣ, намунаи ибрат мебошад.
Маросими гулгузорӣ ҳамчун рамзи арҷгузорӣ ба таърихи пурифтихори миллат ва гиромидошти хотираи неки қаҳрамонон арзёбӣ гардида, иштирокдорон изҳор доштанд, ки пос доштани хотираи чунин фарзандони фидоии Ватан вазифаи муқаддаси ҳар як фарди ватандӯст мебошад.
