Давлати соҳибистиқлоли мо дар ҳифзи суботу амнияти худ ба Артиши миллӣ такя менамояд. Таърихи 33- солаи Артиши миллии ҷумҳуриамон собит намуд, ки он воқеан ба рӯҳи шикастнопазир ва сипари муътамад табдил ёфтааст. Мардуми кишвар ба нерӯ ва тавоноии Артиши миллии худ эътимоди қавӣ дорад.
Чӣ тавре Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ муҳтарам Эмомалӣ Раҳмон бамаврид таъкид доштанд:
“Имрӯз мо метавонем бо ифтихор изҳор намоем, ки мардуми Тоҷикистон дар симои Қувваҳои Мусаллаҳ ҳомиёну муҳофизони боэътимоди худро мебинанд ва дилпурона бо роҳи бунёдкориву созандагӣ пеш мераванд.”
Марҳилаҳои ташаккулёбии Артиши миллии мамлакатамон шаҳодат медиҳад, ки ҳарчанд он дар заминаи холӣ аз сирф асос гузошта шуда замони таъсисёбиаш ба давраи ҳассосу пуршиддати вазъияти амниятӣ – сиёсӣ рост омада бошад ҳам, омодагии баланди ҷангии худро ҳамеша нигоҳ дошта, тақвият бахшид.
Ҷузъу томҳои Қувваҳои Мусаллаҳи кишвар тадриҷан бо афсарони касбӣ пурра гардида, таъминот бо техникаву аслиҳаи низомӣ, сохтмони шаҳракҳои ҳарбӣ ва фароҳам овардани шароитҳои беҳтари хизматӣ торафт беҳтару хубтар гардид. Аз ин ҷост, ки эътимоду боварии ҷомеа нисбати артиш афзуда, ҷавонон ихтиёрӣ барои адо намудани қарзи шаҳрвандии худ ба хизмати низомӣ сафарбар мегарданд.
Ватандӯстӣ ба дониши муайяни ҳарбӣ, иродаву рӯҳияи далерона ва дар вазъияти барои Ватан таҳдидовар асос меёбад. Дӯст доштани Ватан шиор ё эътирофи безамина нест, он як эҳсоси муқаддас аст, ки аз ифтихори баланд, номуси миллӣ ва шарафи ҳифзи марзу буми худӣ сарчашма мегирад.
Ҳайати шахсии Муассисаи давлатии «Мададгори мудофиа» — и Вазорати мудофиаи Ҷумҳурии Тоҷикистон дар таҳкими қудрати мудофиавии мамлакат масъулияти хос ба зимма доранд. Аз ин нигоҳ ин сохтори ҳарбиро мададгори мудофиаи Ватан ва созмони мудофиавӣ ном мебаранд.
Муассисаи давлатии «Мададгори мудофиа» — и Вазорати мудофиаи Ҷумҳурии Тоҷикистон ба таблиѓу ташвиқи анъанаҳои пуршарафи низомии халқи тоҷик, афкори ҳарбии гузаштагони мо, ҷасорату корнамоии хизматчиёни ҳарбии Қувваҳои Мусаллаҳи мамлакатамон, баргузории мусобиқаҳои ҳарбӣ – варзишӣ ва ғайра таваҷҷуҳи хос зоҳир менамояд.
Дар ҳалқаи пайванди миёни артиш ва ҷомеа бошад, Муассисаи давлатии «Мададгори мудофиа» ҳамчун ниҳоди муҳим хизмат мекунад. Зеро наврасону ҷавонони синни тодаъватӣ ва даъватӣ нахустин донишҳои ҳарбиро дар сохторҳои таълимии Муассисаи давлатии «Мададгори мудофиа» омӯхта, аввалин малакаи ибтидоии ҳарбиро пайдо карда, баъдан ба муҳити низомӣ сафарбар мегарданд
Бо баргузории чорабиниҳои тарғиботию маърифатбахшии хусусияти ҳарбӣ – ватандӯстӣ дошта бошад, афсарон ва кормандони Муассисаи давлатии «Мададгори мудофиа» дар мағзу зеҳни муҳофизони ояндаи Ватан афкори ватанхоҳиро ҷой карда, дар қалбу рӯҳи онҳо эҳсоси гарми меҳанпарастиро таҳким мебахшанд. Анҷом додани чунин амал рисолати пок ва самимиву содиқона буда, ба ягон манфиати дигар, ба ҷуз дифои Ватан ва ҳифзи дастовардҳои истиқлол нигаронида нашудааст.
Бо камоли ифтихор ҳамаи хизматчиёни ҳарбӣ – муҳофизони шарафманду диловари кишвар ва кулли ҳамватанони сарбаландамонро ба муносибати 33 – солагии таъсисёбии Қувваҳои Мусаллаҳи Ҷумҳурии Тоҷикистон табрик намуда, ҳисси саршори ватандӯстӣ, садоқат ба миллату Ватан, тандурустии бардавом, пешрафту муваффақиятҳои хизматӣ, саодату хушрӯзӣ, рӯҳи болидаву осмони соф, суботу амнияти пойдор ва кулли шодмонию хушбахтиҳои зиндагиро орзумандам.
Абдулмумин ДАВЛАТЗОДА,
Сардори Муассисаи давлатии «Мададгори мудофиа» — и
Вазорати мудофиаи Ҷумҳурии Тоҷикистон,
генерал-майор
